90 लाखांच्या फसवणुकीच्या गुन्ह्यांतील तीन वॉण्टेड आरोपींना अटक

अरुण सावरटकर
16 जानेवारी 2026
मुंबई, – गारमेंटसाठी लागणारे फ्रॅबिक्स आणि अ‍ॅक्सेसरीजचा व्यवहार क्रिप्टो करन्सीमध्ये केल्यास जास्त परतावा मिळेल असे सांगून एका कापड व्यावसायिकाची सुमारे 90 लाखांची फसवणुक केल्याप्रकरणी तीन वॉण्टेड आरोपी एमआयडीसी पोलिसांनी अटक केली आहे. अ‍ॅन्थोनी चेट्टीयार ऊर्फ अ‍ॅन्थोनी साहिल, सोहेल खान आणि अमजदअली शेख अशी या तिघांची नावे आहेत. फसवणुकीच्या याच गुन्ह्यांत ते तिघेही सध्या पोलीस कोठडीत आहेत. या गुन्ह्यांत ध्रुव मेहता, अजगर हुसैन, शेख अश्पाक, मोहम्मद तौसिम खान आणि मनोज प्रजापती अशा पाचजणांना वॉण्टेड आरोपी दाखविण्यात आले असून त्यांच्या अटकेसाठी पोलिसांनी विशेष मोहीम हाती घेतली आहे. या आरोपींनी एक लाख किंमतीचे युएसडीटी क्रिप्टो करन्सी देण्याचे आमिष दाखवून ही फसवणुक केल्याचे तपासात उघडकीस आले आहे.

राजेश धर्मसी बांभानिया हे कापड व्यापारी असून ते त्यांच्या कुटुंबियासोबत विलेपार्ले येथे राहतात. त्यांची घाटकोपर येथे ओन्ली बेसिक नावाची एक गार्मेट फॅक्टरी आहे. जुलै 2025 रोजी ते व्यवसायानिमित्त चीनच्या गॉनलाऊ शहरात गेले होते. तिथेच त्यांची पिटर एक्सयूशी झाली होती. त्याने त्याचा गार्मेट साहित्य आणि फॅबरिक अ‍ॅक्सेसरीजचा होलसेलचा व्यवसाय असल्याचे सांगितले होते. त्याने त्यांच्यासोबत व्यवहार सुरु करण्यास इच्छुक असल्याचे सांगितले होते. याच दरम्यान त्यांच्या मामेभावाने त्यांची ओळख ध्रुव मेहताशी करुन दिली होती. त्याचा कपडे ट्रेडिंगचा व्यवसाय होता. तो कपडे ट्रेडिंगचा व्यवहार क्रिप्टो करन्सीमध्ये करतो. या व्यवहारातून त्याला चांगले मार्जिन मिळते असे सांगितले.

तुम्हीही क्रिप्टो करन्सीचा वापर केल्यास त्यांना चांगला फायदा होईल असे सांगून त्यांचा विश्वास संपादन करण्याचा प्रयत्न केला होता. त्यामुळे त्यांनी त्याच्याकडे क्रिप्टो करन्सीमध्ये व्यवहार करणारे कोणीही डिलर मार्केटमध्ये आहे का याबाबत विचारणा केली होती. याबाबत त्याने चीनचा रहिवाशी असलेल्या पिटर एक्सयूशी संपर्क साधून त्याचा सल्ला जाणून घेण्याचा प्रयत्न केला होता. त्यानेही त्यांना क्रिप्टो करन्सीमध्ये चांगला फायदा होत असल्याचे सांगितले होते. त्यामुळे त्यांनी त्यांच्याकडे क्रिप्टो करन्सीमध्ये गुंतवणुकीचा निर्णय घेतला होता. ठरल्याप्रमाणे राजेश बांभानिया हे त्यांचा भाऊ अल्पेश पटेल याच्यासोबत अंधेरीतील एका खाजगी कंपनीच्या कार्यालयात गेले होते.

तिथे धु्रवसह इतर सातजण उपस्थित होते. यावेळी ध्रुवने त्यांची ओळख अ‍ॅन्थोनी साहिल, अमजद शेख, अजगर हुसैन, शेख अशफाक, मनोज प्रजापती आणि मोहम्मद तौसिन खान अशी करुन दिली होती. ही रक्कम अ‍ॅन्थोनीला देण्यास सांगून त्याने त्यांना दिलेल्या क्यूआर लिंकवर क्रिस्टो करन्सी ट्रान्स्फर करणार असल्याचे सांगतले. त्यामुळे त्यांनी अ‍ॅन्थोनीला 90 लाख रुपये दिले होते. मात्र बराच वेळ होऊन त्यांनी त्यांना एक लाख युएसडीटी क्रिप्टो करन्सी पाठविली होती. त्यामुळे त्यांनी धु्रवसह इतर सातही आरोपींना संपर्क साधून याबाबत विचारणा केली होती. मात्र त्यांच्याकडून त्यांना काहीच प्रतिसाद मिळाला नाही. नंतर त्यांनी त्यांचे मोबाईल बंद केले होते.

या आरोपींनी गारमेंटसाठी लागणारे फॅब्रिक्स आणि अ‍ॅक्सेसरीजचा व्यवहार क्रिप्टो करन्सीमध्ये केल्यास जास्त फायदा होईल असे सांगून त्यांना 90 लाखांची गुंतवणुक करण्यास प्रवृत्त करुन त्यांची फसवणुक केली होती. त्यांना एक लाख रुपयांचे युएसडीटी ही क्रिप्टो करन्सी न देता त्यांनी दिलेल्या पैशांचा अपहार केला होता. हा प्रकार उघडकीस येताच त्यांनी घडलेला प्रकार एमआयडीसी पोलिसांना सांगितला होता. त्यांच्या तक्रारीनंतर पोलिसांनी संबंधित सर्व आरोपीविरुद्ध अपहारासह फसवणुकीचा गुन्हा दाखल केला होता. गुन्हा दाखल होताच पळून गेलेल्या आरोपींच्या अटकेसाठी पोलिसांनी विशेष मोहीम हाती घेतली होती.

ही शोधमोहीम सुरु असताना एक महिन्यानंतर अ‍ॅन्थोनी चेट्टीयार, सोहेल खान आणि अमजदअली शेख या तिघांना पोलिसांनी अटक केली. चौकशीत त्यांचा या गुन्ह्यांत सहभाग उघडकीस आला होता. त्यामुळे अटकेनंतर त्यांना लोकल कोर्टात हजर करण्यात आले होते. यावेळी कोर्टाने त्यांना पोलीस कोठडी सुनावली आहे. या गुन्ह्यांत ध्रुव मेहता, अजगर हुसैन, शेख अश्पाक, मोहम्मद तौसिम खान आणि मनोज प्रजापती याचा सहभाग उघडकीस आल्याने त्यांचा पोलिसांकडून शोध सुरु आहे.