फसवणुकीप्रकरणी शिल्पा शेट्टी-राज कुंद्राविरुद्ध गुन्हा दाखल

मुंबई क्राईम टाइम्स डॉट कॉम
14 ऑगस्ट 2025
मुंबई, – व्यवसायात गुंतवणुक करण्यास प्रवृत्त करुन गुंतवणुकीवर चांगला परतावा देण्याचे आमिष दाखवून एका वयोवृद्धाची सिनेअभिनेत्री शिल्पा शेट्टी व तिचा पती राज कुंद्रा यांनीच फसवणुक केल्याचा धक्कादायक प्रकार उघडकीस आला आहे. याप्रकरणी या वयोवृद्धाच्या तक्रारीवरुन या दोघांविरुद्ध जुहू पोलिसांनी अपहारासह फसवणुकीचा गुन्हा नोंदविला आहे. या गुन्ह्यांचा तपास आर्थिक गुन्हे शाखेकडे वर्ग करण्यात आला असून गुन्ह्यांचा तपास पोलिसांकडून सुरु करण्यात आला आहे. या गुन्ह्यांत इतर काही आरोपींचा सहभाग उघडकीस आला असून या सर्वांची पोलिसांकडून लवकरच चौकशी करुन जबानी नोंदविण्यात येणार आहे. या चौकशीनंतर दोषींवर योग्य ती कायदेशीर कारवाई होणार असल्याचे पोलिसांनी सांगितले. दरम्यान शिल्पा शेट्टी आणि राज कुंद्रा याच्या वतीने त्यांच्या वकिलांनी एक खुलासा करताना या गुन्ह्यांत त्यांचा काहीही संबंध नसल्याचे सांगितले.

दिपक रामदास कोठारी हे साठ वर्षांचे वयोवृद्ध तक्रारदार असून ते विलेपार्ले परिसरात राहतात. त्यांची लोटस कॅपिटल फायनान्स सव्हिसेस नावाची एक खाजगी कंपनी असून याच कंपनीत ते संचालक म्हणून काम करत होते. दहा वर्षापूर्वी त्यांची शिल्पा शेट्टी आणि राज कुंद्रा यांच्याशी ओळख झाली होती. या दोघांची ओळख त्यांचे परिचित राजेश आर्या यांनी करुन देताना ते दोघेही बेस्ट डिल या गृहखरेदी आणि ऑनलाईन रिटेल प्लॅटफॉर्मचे संचालक असल्याचे सांगितले. या ओळखीनंतर त्यांच्यात मैत्रीपूर्ण संबंध निर्माण झाले होते. काही दिवसांनी या दोघांनी त्यांना त्यांच्या व्यवसायासाठी कर्जाची गरज असून त्यांनी त्यांच्या व्यवसायात गुंतवणुक करावी. या गुंतवणुकीवर त्यांना चांगला परतावा देण्याचे आश्वासन दिले होते. इतकेच नव्हे तर दरमाह त्यांना मुद्दल रक्कमेसह व्याजाच्या रक्कमेची परतफेड केली जाईल असे सांगून त्यांचा विश्वास संपादन करण्याचा प्रयत्न केला होता. त्यांच्यावर विश्वास ठेवून त्यांनी त्यांच्या कंपनीत गुंतवणुकीचा निर्णय घेतला होता.

ठरल्याप्रमाणे एप्रिल 2015 रोजी त्यांनी शेअर सबस्क्रिशन करारातंर्गत 39 कोटी 90 लाख रुपये आणि सप्टेंबर 2015 रोजी 25 कोटी 83 लाख अशी 60 कोटी 48 लाख रुपयांची गुंतवणुक केली होती. या गुंंतवणुकीवर त्यांना मासिक कर्जाचा परतावा आणि व्याजाची रक्कम देण्याबाबत ठराव करण्यात आला होता. याच दरम्यान सप्टेंबर 2016 रोजी शिल्पा शेट्टी हिने कंपनीच्या संचालक पदाचा राजीनामा दिला होता. त्यानंतर पुढच्या वर्षी म्हणजे 2017 रोजी राज कुंद्राने दुसर्‍या करारात चूक केल्याने कंपनीला प्रचंड आर्थिक नुकसान झाले होते. त्यामुळे कंपनीवर दिवाळखोरीची कारवाई सुरु करण्यात आली होती. शिल्पा शेट्टी आणि राज कुंद्रा यांनी व्यवसायात गुंतवणुकीच्या नावाने कर्ज स्वरुपात त्यांच्याकडून 60 कोटी 48 लाख रुपये घेतले होते, मात्र या पैशांचा व्यवसायात वापर न करता वैयक्तिक फायद्यासाठी वापर करुन त्यांची फसवणुक केली होती.

हा प्रकार लक्षात येताच त्यांनी त्यांच्या गुंतवणुकीच्या पैशांची मागणी सुरु केली होती. मात्र त्यांनी त्यांना व्याजासह मुद्दल रक्कम परत न करता त्यांची फसवणुक केली. हा प्रकार लक्षात येताच त्यांनी जुहू पोलिसांत शिल्पा शेट्टी आणि राज कुंद्रा यांच्याविरुद्ध तक्रार केली होती. या तक्रारीची शहानिशा केल्यानंतर या दोघांविरुद्ध पोलिसांनी अपहारासह फसवणुकीचा गुन्हा दाखल केला आहे. या गुन्ह्यांची व्याप्ती मोठी असल्याने या गुन्ह्यांचा तपास आता आर्थिक गुन्हे शाखेकडे वर्ग करण्यात आला आहे. या गुन्ह्यांत शिल्पा, राजसह इतर काही आरोपींचा सहभाग असल्याचे उघडकीस आल्याने त्यांच्याविरुद्ध पोलिसांनी कारवाई करण्यास सुरुवात केली आहे.