एमबीबीएस प्रवेशाच्या नावाने महिलेची साडेचौदा लाखांची फसवणुक

मुंबई क्राईम टाइम्स डॉट कॉम
21 जुलै 2025
मुंबई, – एमबीबीएस प्रवेशाच्या नावाने एका महिलेची साडेचौदा लाखांची फसवणुक झाल्याचा प्रकार धोबीतलाव परिसरात उघडकीस आली आहे. याप्रकरणी तीन भामट्याविरुद्ध आझाद मैदान पोलिसांनी अपहारासह फसवणुकीचा गुन्हा दाखल केला आहे. मोहम्मद वसीम, ऐनुल जैनुल हसन ऊर्फ रेहान आणि कृष्णमोहन शर्मा ऊर्फ निरज अशी या तिघांची नावे आहेत. तिन्ही आरोपी पळून गेल्याने त्यांच्या अटकेसाठी पोलिसांनी विशेष मोहीम हाती घेतली आहे.

सईदाबेगम अब्दुल अकील ही महिला तिचा मुलगा अब्दुल रझाक याच्यासोबत मरिनलाईन्सच्या धोबीतलाव परिसरात राहते तर तिचे पती अब्दुल अकील आणि दुसरा मुलगा अब्दुल रेहमान हे दोघेही त्यांच्या नांदेड येथील गावी राहतात. तिची मुलगी फरहीन बेगम ही बीएएमएसच्या शिक्षणासाठी नाशिक येथे शिक्षण घेत आहेत. फेब्रुवारी 2022 रोजी तिची मुलगी एल. एन अ‍ॅकडमी येथे नीट परिक्षेची ऑनलाईन परिक्षेची तयारी करत होती. याच दरम्यान तिची मोहम्मद वसीम या तरुणाशी ओळख झाली होती. या ओळखीनंतर त्यांच्यात चांगली मैत्री झाली होती. मोहम्मद वसीमने तिला त्याच्या परिचित काही लोक असून ते एमबीबीएससाठी मेडीकल कॉलेजमध्ये प्रवेश मिळवून देण्यास मदत करत असल्याची माहिती सांगितली होती.

याच लोकांनी त्याचे एम्स रिशीकेश कॉलेजमध्ये अ‍ॅडमिशन झाल्याची माहिती सांगून त्याच्या अ‍ॅडमिशनचे लेटर व्हॉटअप पाठवून त्याने तिचा विश्वास संपादन केला होता. काही दिवसांनी त्याने तिची ओळख निरज आणि रेहान यांच्याशी करुन दिली होती. ते दोघेही मूळचे उत्तरप्रदेशचे रहिवाशी होते. तिच्या एमबीबीएस प्रवेशासाठी त्यांनी तिच्याकडे आधी 24 लाख आणि नंतर चर्चेअंती 21 लाखांमध्ये काम करुन देण्याचे आश्वासन दिले होते. ही माहिती तिने तिच्या आईला सांगितली होती. त्यामुळे तिने तिच्या मुलीच्या एमबीबीएस प्रवेशासासाठी या दोघांनाही टप्याटप्याने साडेचौदा लाख रुपये पाठविले होते.

फेब्रुवारी ते डिसेंबर 2022 या कालावधीत ही रक्कम त्यांच्या बँक खात्यात ट्रान्स्फर झाली होती. मात्र दिलेल्या मुदतीत त्यांनी तिच्या मुलीला मेडीकल कॉलेजमध्ये प्रवेश मिळवून दिला नाही. विचारणा केल्यानंतर ते दोघेही तिला एक वर्ष थांबा, पुढच्या वर्षी नक्की प्रवेश मिळेल असे सांगत होते. मात्र एक वर्ष उलटूनही त्यांनी तिला मेडीकल कॉलेजमध्ये प्रवेश दिला नव्हता. त्यामुळे त्यांनी त्यांच्याकडे पैशांची मागणी केली होती. मात्र त्यांनी तिला पैसे परत केले नाही. मोहम्मद वसीमने इतर दोन आरोपींशी संगनमत करुन तिच्या मुलीला एमबीबीएससाठी प्रवेश देतो असे सांगून तिच्याकडे साडेचौदा लाख रुपये घेतले,

मात्र प्रवेश न देता तसेच पैसे परत न करता तिची फसवणुक केली होती. हा प्रकार लक्षात येताच सईदाबेगम अकीलने आझाद मैदान पोलिसांत तक्रार केली होती. या तक्रारीची शहानिशा केल्यानंतर मोहम्मद वसीम, ऐनुल हसन र्ऊ रेहान आणि कृष्णमोहन शर्मा ऊर्फ निरज या तिघांविरुद्ध अपहारासह फसवणुकीचा गुन्हा दाखल केला आहे. या गुन्ह्यांचा तपास सुरु असून आरोपींच्या अटकेसाठी पोलिसांनी विशेष मोहीम हाती घेतली आहे. या टोळीने अशाच प्रकारे इतर काही गुन्हे केल्याची शक्यता वर्तविण्यात येत आहे.