सीएसएमटी रेल्वे स्थानकासह आंतरराष्ट्रीय विमानतळावर बॉम्बची धमकी
रेल्वे स्थानकासह विमानतळाची तपासणीनंतर अफवा असल्याचे उघड
मुंबई क्राईम टाइम्स डॉट कॉम
26 जुलै 2025
मुंबई, – छत्रपती शिवाजी महाराज रेल्वे टर्मिनससह छत्रपती शिवाजी महाराज आंतरराष्ट्रीय विमानतळावर पुन्हा बॉम्बच्या कॉलने तणावाचे वातावरण निर्माण झाले होते, संपूर्ण रेल्वे स्थानकासह विमानतळाची तपासणी केल्यानंतर बॉम्बची ती अफवा असल्याचे उघडकीस आले आहे. दरम्यान महाराष्ट्र राज्य व मुंबई पोलिसांच्या कंट्रोल रुमला बॉम्बचा कॉल करणार्‍या अज्ञात व्यक्तीच्या अटकेसाठी स्थानिक पोलिसांसह गुन्हे शाखेच्या अधिकार्‍यांनी विशेष मोहीम हाती घेतली आहे. या धमकीनंतर रेल्वे स्थानकासह विमानतळावरील सुरक्षेत प्रचंड वाढ करण्यात आली आहे.
गेल्या काही वर्षांत बॉम्बच्या अफवांच्या कॉल आणि ईमेलने मुंबई पोलिसांची चांगलीच ताराबंळ उडाली होती. या कॉल आणि ईमेलनंतर पोलीस संंबंधित ठिकाणी जाऊन तपासणी करते, मात्र तिथे काहीही आक्षेपार्ह वस्तू सापडत नाही, त्यामुळे सतत येणार्‍या बोगस कॉल आणि ईमेलमुळे पोलिसांना विनाकारण नाहक त्रास सहन करावा लागत आहे. गेल्या काही महिन्यांत शंभरहून बोगस कॉल पोलिसांना प्राप्त झाले आहे.
शुक्रवारी दुपारी एका अज्ञात व्यक्तीने मुंबई पोलिसांच्या कंट्रोल रुमला कॉल करुन छत्रपती शिवाजी महाराज आंतरराष्ट्रीय विमानतळावरील टी दोन येथे बॉम्ब ठेवल्याचा कॉल केला होता. ही माहिती नंतर वरिष्ठांसह स्थानिक पोलिसांना देण्यात आली होती. या माहितीनंतर स्थानिक पोलिसांसह गुन्हे शाखेच्या अधिकार्‍यांनी बॉम्बशोधक व नाशक पथक तसेच श्वान पथकासह घटनास्थळी धाव घेतली होती. या पथकाने संपूर्ण विमानतळाची तपासणी केली होती. मात्र तपासणीनंतर तिथे काहीही आक्षेपाह्र वस्तू सापडली नाही. त्यामुळे बॉम्बची ती अफवा असल्याचे उघडकीस आले आहे.
ही घटना ताजी असताना राज्य पोलीस मुख्यालयाच्या कंट्रोल रुमला अशाच प्रकारे एका अज्ञात व्यक्तीने कॉल केला होता. त्यात त्याने छत्रपती शिवाजी महाराज रेल्वे टर्मिनस रेल्वे स्थानकात बॉम्बस्फोट होणार असल्याचे सांगितले होते. या घटनेनंतर रेल्वे पोलिसांसह आरपीएस पोलिसांनी संपूर्ण सीएसएमटी रेल्वे स्थानकाची तपासणी केली होती. बॉम्बशोधक व नाशक पथकासह श्वान पथकाने केलेल्या तपासणीदरम्यान कुठेही काहीही आक्षेपार्ह वस्तू सापडली नाही. तो कॉल असल्याचे उघडकीस आले.
याप्रकरणी स्थानिक पोलिसांनी बॉम्बचा बोगस कॉल करुन भीतीचे वातावरण निर्माण केल्याप्रकरणी दोन स्वतंत्र गुन्हे नोंदवून तपास सुरु केला आहे. ज्या मोबाईलवरुन हा कॉल आला होता, त्या कॉलची माहिती काढण्याचे काम सुरु आहे. लवकरच संबंधित व्यक्तींना चौकशीसाठी ताब्यात घेतले जाणार असल्याचे पोलिसांकडून सांगण्यात आले. दरम्यान बॉम्बच्या या कॉलमुळे रेल्वे स्थानकासह आंतरराष्ट्रीय विमानतळावर प्रचंड तणावाचे वातावरण निर्माण झाले होते. त्यामुळे तेथील सुरक्षा व्यवस्थेत प्रचंड वाढ करण्यात आली आहे.
