दहिहंडी बंदोबस्तात असलेल्या पोलीस हवालदाराला मारहाण

मुंबई क्राईम टाइम्स डॉट कॉम
18 ऑगस्ट 2025
मुंबई, – दहिहंडी बंदोबस्तात असलेल्या योगेश प्रमोद मेहेर या पोलीस हवालदाराशी एका रिक्षाचालकाने हुज्जत घालून, शिवीगाळ करुन ठोसा लगावून सरकारी कामात अडथळा आणल्याचा प्रकार दहिसर परिसरात उघडकीस आला. याप्रकरणी विविध कलमांतर्गत गुन्हा दाखल होताच अक्षय चंदू उगरेजा या 28 वर्षांच्या आरोपी रिक्षाचालकाला दहिसर पोलिसांनी अटक केली. अटकेनंतर त्याला नोटीस देऊन सोडून देण्यात आले आहे. तपासात अक्षय हा दारुच्या नशेत असताना रिक्षा चालवून प्रवासी भाडे नाकारत होता. त्याचा जाब विचारला म्हणून त्याने पोलीस हवालदार योगेश मेहेर यांना जोरात ठोसा लगावल्याचे तपासात उघडकीस आले आहे.

योगेश मेहेर हे विरार येथे राहत असून सधया दहिसर पोलीस ठाण्यात पोलीस हवालदार म्हणून कार्यरत आहेत. शनिवारी दहिहंडी उत्सव असल्याने ते त्यांच्या सहकार्‍यासोबत दहिसरयेथील हरिशंकर जोशी मार्ग, स्टार मित्र मंडळ, चारनाका व्हीआयपी सेंटर परिसरात बंदोबस्तासाठी हजर होते. रात्री सव्वाआठ वाजता चारनाका व्हीआयपी सेंटरजवळ एक रिक्षाचालक काही प्रवाशांचे भाडे नाकारत होता. त्यामुळे ते त्याच्याकडे गेले आणि भाडे का नाकारत आहे याबाबत विचारणा केली. यावेळी त्याने त्यांच्याशी हुज्जत घालण्याचा प्रयत्न केला. यावेळी योगेश मेहेर यांना रिक्षाचालकाने मद्यप्राशन केल्याचे दिसून आले. त्यामुळे त्यांनी त्याला ताब्यात घेऊन पोलीस ठाण्यात आणण्याचा प्रयत्न केला होता.

पोलीस ठाण्यात नेत असताना त्याने त्यांना शिवीगाळ करुन त्यांच्या तोंडाला जोरात ठोसा मारला होता. तसेच त्यांच्या सरकारी कामात अडथळा आणण्याचा प्रयत्न केला होता. अचानक त्याने त्यांना ठोसा मारल्याने ते किरकोळ जखमी झाले होते. पोलीस ठाण्यात आल्यानंतर योगेश मेहेर यांच्या तक्रारीवरुन पोलिसांनी रिक्षाचालकाविरुद्ध कर्तव्य बजाविणार्‍या पोलीस हवालदाराशी हुज्जत घालणे, शिवीगाळ करुन मारहाण करणे, सरकारी कामात अडथळा आणल्याप्रकरणी गुन्हा दाखल केला होता. गुन्हा दाखल होताच त्याला पोलिसांनी अटक केली. अटकेनंतर त्याला नोटीस देऊन सोडून देण्यात आले. तपासात आरोपी रिक्षाचालकाचे नाव अक्षय उगरेजा असून तो दहिसर येथील शांतीनगर डोंगरी, जनकल्याण इमारत क्रमांक तीनमध्ये राहत असल्याचे उघडकीस आले.