हायड्रोपोनिक गांजासह दोन प्रवाशांना विमानतळावर अटक

मुंबई क्राईम टाइम्स डॉट कॉम
28 ऑगस्ट 2025
मुंबई, – हायड्रोपोनिक गांजाच्या तस्करी केल्याप्रकरणी दोन प्रवाशांना सीमा शुल्क विभागाने छत्रपती शिवाजी महाराज आंतरराष्ट्रीय विमानतळावर अटक केली. या दोन्ही प्रवाशांकडून या अधिकार्‍यांनी 19 कोटी 65 लाखांचा हायड्रोपोनिक गांजाचा साठा जप्त केला आहे. त्यांच्याविरुद्ध एनडीपीएस कलमांतर्गत कारवाई करण्यात आल्याचे सांगण्यात आले. अटकेनंतर दोघांनाही किल्ला कोर्टाने चौदा दिवसांची न्यायालयीन कोठडी सुनावली आहे.

गेल्या काही महिन्यांत बँकाँकहून मोठ्या प्रमाणात हायड्रोपोनिक गांजाची तस्करी होत असल्याने बँकाँकहून येणार्‍या प्रत्येक संशयित प्रवाशांची सीमा शुल्क विभागाने चौकशी करुन त्यांच्या बॅगेची तपासणी सुरु केली होती. ही मोहीम सुरु असताना गेल्या दोन दिवसांत बँकॉकहून आलेल्या दोन वेगवेगळ्या घटनेत दोन प्रवाशांना या अधिकार्‍यांनी चौकशीसाठी ताब्यात घेतले होते. या दोन्ही प्रवाशांनी त्याचंया ट्रॉली बॅगेत हायड्रोपोनिक गांजा आणल्याचे उघडकीस आले होते.

या दोन्ही कारवाईत या अधिकार्‍यांनी 19 किलो 650 ग्रॅम वजनाचा गांजा जप्त केला होता. त्याची आंतरराष्ट्रीय बाजारात किंमत 19 कोटी 65 लाख रुपये इतकी आहे. हा साठा जप्त केल्यानंतर या दोघांनाही या अधिकार्‍यांनी चौकशीसाठी ताब्यात घेतले होते. त्यांच्याविरुद्ध एनडीपीएस कलमांतर्गत गुन्हा नोंदवून नंतर त्यांच्यावर अटकेची कारवाई करण्यात आली होती. अटकेनंतर त्यांना कोर्टात हजर करण्यात आले होते. यावेळी कोर्टाने त्यांना चौदा दिवसांची न्यायालयीन कोठडी सुनावली आहे.

बँकाँक हायड्रोनिक गांजाची तस्करी करण्याचा मुख्य केंद्र बनत असल्याने अशा ड्रग्ज तस्कराविरुद्ध सीमा शुल्क विभागाने विशेष मोहीम हाती घेतली आहे. गेल्या काही महिन्यांत या अधिकार्‍यांनी काही प्रवाशांना अटक करुन त्यांच्याकडून कोट्यवधी रुपयांचा हायड्रोपोनिक गांजाचा साठा जप्त केल्याचे एका अधिकार्‍याने बोलताना सांगितले.