शेअर ट्रेडिंगची लिंक पाठवून पाच कोटीची ऑनलाईन फसवणुक

मुंबई क्राईम टाईम्स डॉट कॉम
१४ जून २०२४
मुंबई, – शेअर ट्रेडिंगची लिंक पाठवून एका खाजगी कंपनीच्या वरिष्ठ अधिकार्‍याची सुमारे पाच कोटीची फसवणुक कटातील दोन वॉण्टेड आरोपींना अटक करण्यात पश्‍चिम प्रादेशिक विभागाच्या सायबर सेलला यश आले आहे. हमप्रीतसिंग रंदावा आणि विमल प्रकाश गुप्ता अशी या दोघांची नावे असून अटकेनंतर या दोघांनाही वांद्रे येथील लोकल कोर्टाने पोलीस कोठडी सुनावली आहे. यातील हमप्रीतसिंग हा खाजगी शिकवणी घेत असून विमल गुप्ता हा सुरक्षारक्षक म्हणून काम करतो. या दोघांनी फसवणुकीच्या गुन्ह्यांतील सायबर ठगांना बोगस दस्तावेज सादर करुन बँक खाते उघडून दिले होते. याकामी हमप्रीतला पन्नास तर विमलला दहा हजार रुपये मिळाल्याचे तपासात उघडकीस आले आहे. या कटातील इतर आरोपींची नावे समोर आली असून त्यांच्या अटकेसाठी आता सायबर सेलने विशेष मोहीम हाती घेतली आहे.

४७ वर्षांचे तक्रारदार अंधेरीतील साकिनाका टेलिफोन एक्सचेंज, सफेद फुल परिसरातील एका पॉश अपार्टमेंटमध्ये त्यांच्या कुटुंबियांसोबत राहतात. ते एका खाजगी कंपनीत वरिष्ठ अधिकारी म्हणून कामाला आहे तर त्यांची पत्नीही एका खाजगी कंपनीत काम करते. जानेवारी महिन्यांच्या पहिल्या आठवड्यात त्यांच्या वडिलांचा मोबाईल क्रमांक एका व्हॉटअप ग्रुपमध्ये ऍड करण्यात आला होता. या ग्रुपमध्ये त्यांच्यासह २०१ सभासद होते. ग्रुपमध्ये ज्योती अरोरा आणि शेखर नावाचे दोन ऍडमीन शेअरसंदर्भात माहिती देत होते. कुठल्या शेअरमध्ये गुंतवणुक केल्यास चांगला परवाता मिळेल याबाबत दररोज माहिती दिली होती. याबाबत त्यांच्या वडिलांनी शेअर मार्केट तपासून पाहिले असता ते दोघेही देत असलेली माहिती खरी असल्याचे त्यांच्या लक्षात आले होते. त्यामुळे त्यांनी शेअरमध्ये गुंतवणुकीचा निर्णय घेतला होता. याच दरम्यान त्यांना ग्रुपच्या ऍडमिनने विविध कंपनीच्या शेअरमध्ये गुंतवणुकीचा सल्ला देताना त्यांना चांगला परतावा मिळवून देण्याचे आश्‍वासन दिले होते. त्यासाठी त्यांना शेअरसंदर्भातील एक लिंक पाठविण्यात आली होती. ती लिंक ओपन केल्यानंतर एक ऍप उघडले होते. त्यानंतर त्यांनी त्यांची वैयक्तिक माहितीसह बँक खात्याचा तपशील अपलोड केला होता. १० जानेवारी ते १ मार्च २०२४ या कालावधीत ऍडमिनच्या सांगण्यावरुन त्यांनी विविध शेअरमध्ये पाच कोटी चौदा लाखांची गुंतवणुक केली होती. या गुंतवणुकीवर त्यांना काही दिवसांत ८७ लाख रुपयांचा नफा झाल्याचे दिसून येत होता. त्यामुळे त्यांना त्यांच्यावर विश्‍वास बसला होता. मात्र गुंतवणुकीसह परताव्याची रक्कम त्यांना त्यांच्या बँक खात्यात ट्रान्स्फर करता येत नव्हती. याबाबत सतत विचारणा करुनही समोरुन त्यांना प्रतिसाद मिळत नव्हता.

फसवणुकीचा हा प्रकार लक्षात येताच त्यांनी सायबर सेल पोलिसांत तक्रार केली होती. या तक्रारीनंतर पोलिसांनी फसणुकीसह आयटी कलमांतर्गत गुन्हा नोंदवून अज्ञात सायबर ठगांचा शोध सुरु केला होता. ही शोधमोहीम सुरु असताना सहाय्यक पोलीस निरीक्षक नितीन गचछे, संग्राम जाधव, विजय जाधव, सुरेश लोकरे यांनी संबंधित बँक खात्याची माहिती काढण्याचा प्रयत्न केला होता. ही माहिती प्राप्त होताच या पथकाने गोरेगाव येथून हमप्रीत तर विमलला विरार येथून संशयित आरोपी म्हणून ताब्यात घेतले होते. चौकशीत या गुन्ह्यांत त्यांचा सहभाग उघडकीस आला होता. विमल हा खाजगी शिकवणी घेत असून विमल हा सुरक्षारक्षक म्हणून काम करतो. अटक टाळण्यासाठी त्यांनी बँकेत खोटी माहिती दिली होती. फसवणुकीसाठी त्यांनीच सायबर ठगांना बँक खाते पुरविल्याचे उघडकीस आले असून त्यासाठी हमप्रीतला ५० हजार तर विमलला १० हजार रुपयांचे कमिशन मिळाले होते. त्यांच्या इतर सहकार्‍यांच्या अटकेसाठी आता पोलिसांनी विशेष मोहीम हाती घेतली आहे.