साडेसोळा कोटीच्या ड्रग्जसहीत विदेशी नागरिकाला अटक

मुंबई क्राईम टाइम्स डॉट कॉम
२ फेब्रुवारी २०२५
मुंबई, – सुमारे साडेसोळा कोटीच्या ड्रग्जसहीत एका विदेशी नागरिकाला छत्रपती शिवाजी महाराज आंतरराष्ट्रीय विमानतळावर हवाई गुप्तचर विभागाच्या अधिकार्‍यांनी अटक केली. फर्नांडो जेरोनिमो संतोस डिल्व्हिा असे या २४ वर्षीय नागरिकाचे नाव असून तो मूळचा ब्राझिलचा नागरिक आहे. त्याच्या पोटातून काढलेल्या कॅप्सूलमधून या अधिकार्‍यांनी १ किलो ६४९ ग्रॅम वजनाचे ड्रग्ज जप्त केले आहे. त्याच्याविरुद्ध एनडीपीएस कलमांतर्गत कारवाई करण्यात आली असून याच गुन्ह्यांत त्याला किल्ला कोर्टाने न्यायालयीन कोठडी सुनावली आहे.

२७ जानेवारीला फर्नांडो हा पॅरीसमार्गे मुंबईतील छत्रपती शिवाजी महाराज आंतरराष्ट्रीय विमानतळावर आला होता. त्याची हालचाल संशयास्पद वाटताच त्याला हवाई गुप्तचर विभागाने चौकशीसाठी ताब्यात घेतले होते. चौकशीदरम्यान त्याने पोटातून कॅप्सूलद्वारे ड्रग्ज आणल्याची कबुली दिली होती. त्यानंतर त्याला कोर्टाच्या परवानगीने जवळच्या शासकीय हॉस्पिटलमध्ये दाखल करण्यात आले होते. गेल्या पाच दिवसांत त्याच्या पोटातून डॉक्टरांनी १७० हून अधिक कॅप्सूल जप्त केले होते. या कॅप्सूलमधून या अधिकार्‍यांनी १ किलो ६४९ ग्रॅम वजनाचे ड्रग्ज जप्त केले असून त्याची किंमत सुमारे साडेसोळा कोटी रुपये इतकी आहे. ते ड्रग्ज जप्त केल्यानंतर त्याच्याविरुद्ध एनडीपीएस कलमांतर्गत गुन्हा दाखल करण्यात आला होता. याच गुन्ह्यांत त्याला शनिवारी या अधिकार्‍यांनी अटक केली.

अटकेनंतर त्याला रविवारी दुपारी किल्ला कोर्टात हजर करण्यात आले होते. यावेळी कोर्टाने त्याला न्यायालयीन कोठडीत पाठविले आहे. फर्नांडो हा मूळचा ब्राझिलचा नागरिक असून तो ब्राझिलवरुन पॅरीसला गेला आणि तेथून मुंबईत आला होता. त्याला ते ड्रग्ज कोणी दिले होते, ते ड्रग्ज तो मुंबईत कोणाला देणार होता याचा तपास सुरु आहे.