विदेशातून हायड्रोपोनिक गांजाच्या तस्करीचे सत्र सुरुच

मुंबई क्राईम टाइम्स डॉट कॉम
3 सप्टेंबर 2025
मुंबई, – गेल्या काही महिन्यांपासून विदेशातून हायड्रोपोनिक गांजाच्या तस्करीचे सत्र सुरु असून बुधवारी अशाच एका कारवाईत छत्रपती शिवाजी महाराज आंतरराष्ट्रीय विमानतळावर एका प्रवाशाला कस्टम अधिकार्‍यांनी अटक केली. या प्रवाशाकडून या अधिकार्‍यांनी 12 कोटीच्या हायड्रोपोनिक गांजाचा साठा जप्त केला आहे. याप्रकरणी एनडीपीएस कलमांतर्गत गुन्हा दाखल होताच या प्रवाशावर अटकेची कारवाई करण्यात आली. अटकेनंतर त्याला किल्ला कोर्टाने चौदा दिवसांची न्यायालयीन कोठडी सुनावली आहे.

गेल्या काही महिन्यांपासून विदेशातून विशेषता बँकाँकहून मोठ्या प्रमाणात हायड्रोपोनिक गांजाची तस्करी होत आहे. गेल्या दोन ते तीन महिन्यांत कस्टम अधिकार्‍यांनी हायड्रोपोनिक गांजाची तस्करी केल्याप्रकरणी काही प्रवाशांना अटक केली होती. त्यांच्याकडून कोट्यवधी रुपयांचा गांजाचा साठा जप्त केला होता. ही कारवाई सुरु असताना गांजा तस्करीचे सत्र सुरु असल्याचे दिसून येत आहे. त्यामुळे अशा तस्कराविरुद्ध कस्टम अधिकार्‍यांनी विशेष मोहीम हाती घेतली होती. मंगळवारी रात्री आरोपी प्रवाशी कोलांलापूरहून मुंबईच्या छत्रपती शिवाजी महाराज आंतरराष्ट्रीय विमानतळावर आला होता.

तो विमानतळाबाहेर जाण्याच्या तयारीत असताना त्याला या अधिकार्‍यांनी चौकशीसाठी ताब्यात घेतले होते. यावेळी त्याच्या चेक-इन ट्रॉली बॅगेची तपासणी केल्यानंतर त्यात या अधिकार्‍यांना 12 किलो 260 ग्रॅम वजनाचे हायड्रोपोनिक गांजाचा साठा सापडला. आंतरराष्ट्रीय बाजारात या गांजाची किंमत 12 कोटी 26 लाख रुपये इतकी आहे. या गांजासह त्याला नंतर पोलिसांनी ताब्यात घेतले होते. त्याच्याविरुद्ध एनडीपीएस कलमांतर्गत गुन्हा नोंदवून नंतर त्याच्यावर अटकेची कारवाई करण्यात आली होती. याच गुन्ह्यांत तो सध्या न्यायालयीन कोठडीत आहे.