कोट्यवधी रुपयांच्या विदेशी चलनाच्या तस्करीचा पर्दाफाश

मुंबई क्राईम टाइम्स डॉट कॉम
4 ऑक्टोंबर 2025
मुंबई, – आबूधाबी आणि फुजेराह येथे जाणार्‍या विमानातून विदेशी चलनाच्या तस्करीचा प्रयत्न सीमा शुल्क विभागाच्या अधिकार्‍यांनी हाणून पाडला. छत्रपती शिवाजी महाराज आंतरराष्ट्रीय विमानतळावर आलेल्या दोन प्रवाशांना विदेशी चलनासह या अधिकार्‍यांनी अटक केली. या दोघांकडून या अधिकार्‍यांनी एक कोटी सात लाख छत्तीस हजार रुपयांचे विदेशी चलन हस्तगत केले आहेत. विदेशी चलनाची तस्करी केल्याप्रकरणी दोघांविरुद्ध गुन्हा नोंदवून त्यांच्यावर अटकेची कारवाई करण्यात आली आहे.

छत्रपती शिवाजी महाराज आंतरराष्ट्रीय विमानतळावर ड्रग्ज, विदेशी चलन आणि गोल्डची तस्करी होऊ नये म्हणून सीमा शुल्क विभागाने विशेष मोहीम हाती घेतली होती. ही मोहीम सुरु असताना शनिवारी आंतरराष्ट्रीय विमानतळावर एक प्रवाशी आबूधाबी येथे जाण्यासाठी आला होता. त्याच्याकडे विदेशी चलन होते, ही माहिती प्राप्त होताच या अधिकार्‍यांनी या प्रवाशाला चौकशीसाठी ताब्यात घेतले होते. त्याच्या बॅगेची तपासणी केल्यानंतर त्याने त्याच्या हॅण्ड बॅगेत विदेशी चलन लपवून ठेवल्याचे उघडकीस आले. या बॅगेतून या अधिकार्‍यांनी 53 लाख 68 हजार रुपयांचे विदेशी चलन जप्त केले होते.

ही कारवाई ताजी असताना अशाच प्रकारे अन्य एका प्रवाशाला या अधिकार्‍यांनी ताब्यात घेतले होते. त्याच्या बॅगेची तपासणी केल्यानंतर त्यात 53 लाख 68 हजार रुपयांचे विदेशी चलन सापडले. त्यानेही ते विदेशी चलन त्याच्या हॅण्ड बॅगेत लपवून आणले होते. तो फुजेराह येथे जाण्यासाठी शनिवारी आंतरराष्ट्रीय विमानतळावर आला होता. या दोन्ही कारवाईत या अधिकार्‍यांनी दोन्ही प्रवाशांना अटक करुन त्यांच्याकडून 1 कोटी 7 लाख 36 हजार रुपयांचे विदेशी चलन हस्तगत केले आहे. त्यांच्याविरुद्ध विदेशी चलनाची तस्करी केल्याप्रकरणी कारवाई करण्यात आली आहे.