डॉक्टरच्या घरी करणार्‍या दुकलीस अटक व कोठडी

मुंबई क्राईम टाइम्स डॉट कॉम
१४ जानेवारी २०२५
मुंबई, – अंधेरी येथे राहणार्‍या एका महिला डॉक्टरच्या घरी चोरी करुन पळून गेलेल्या एका वयोवृद्धासह दुकलीस अंधेरी पोलिसांनी अटक केली. मनोज महेंद्रसिंग चितालिया (६२)आणि मोहसीन कादर बुलोच (३७) अशी या दोघांची नावे आहेत. अटकेनंतर या दोघांनाही लोकल कोर्टाने पोलीस कोठडी सुनावली आहे. दोन्ही आरोपी घरफोडीच्या गुन्ह्यांतील सराईत गुन्हेगार असून त्यांच्याविरुद्ध विविध पोलीस ठाण्यात अनेक गुन्ह्यांची नोंद आहे. त्यांच्या अटकेने अंधेरी पोलीस ठाण्यातील दोन घरफोडीच्या गुन्ह्यांची उकल करण्यात पोलिसांना यश आले आहे. या दोघांकडून पोलिसांनी सोन्याची माळ, हिरेजडीत कानातील कुडी, एक घड्याळ असा चोरीचा मुद्देमाल पोलिसांनी हस्तगत केला आहे.

सोनाली रोहित चैंबळ या ५१ वर्षांच्या महिला डॉक्टर आहे. त्यात त्यांच्या पती, सासू आणि मुलांसोबत अंधेरीतील सहार रोड, तिरुपती सोसायटीमध्ये राहतात. सध्या त्या एम्का हाऊस प्रायव्हेट हेल्थ केअर या ठिकाणी सहाय्यक डॉक्टर म्हणून कामाला आहेत. त्यांचे पती रोहित हे महाराष्ट्र हाऊसिंगमधून निवृत्त झाले असून दोन्ही मुले शिक्षण घेतात. ३ जानेवारी त्यांच्या घरी कोणीही नव्हते. हीच संधी साधून अज्ञात चोरट्याने त्यांच्या घरात प्रवेश केला होता. कपाटातील ३ लाख ६८ हजार रुपयांचे विविध सोन्याचे दागिने घेऊन चोरट्याने पलायन केले होते. त्यांचा मुलगा दुपारी पाऊणच्या सुमारास घरी आल्यानंतर त्याला हा प्रकार समजला होता. त्यामुळे त्याने ही माहिती फोनवरुन त्यांना दिली होती. चोरी करुन पळून जाताना त्याने एका अज्ञात व्यक्तीला पाहिले होते. ही माहिती नंतर सोनाली चैंबळ हिने अंधेरी पोलिसांना दिली होती. तिच्या तक्रारीवरुन पोलिसांनी अज्ञात चोरट्याविरुद्ध घरफोडीचा गुन्हा दाखल केला होता. गुन्हा दाखल होताच पळून गेलेल्या आरोपींचा पोलिसांनी शोध सुरु केला होता.

परिससरातील सीसीटिव्ही फुटेज आणि तांत्रिक माहितीवरुन वरिष्ठ पोलीस निरीक्षक रमेश भामे यांच्या पथकातील पोलीस उपनिरीक्षक परकाळे, संतोष बडे, पोलीस हवालदार पेडणेकर, सूर्यवंशी, शिंदे, पोलीस शिपाई जाधव, लोंढे, म्हात्रे, कापसे, मोरे, पोलीस हवालदास पिसाळ यांनी शनिवारी मनोज आणि मोहसीन या दोघांना विरार येथून ताब्यात घेतले होते. चौकशीत त्यांनीच ही घरफोडी केल्याची कबुली दिली. या कबुलीनंतर या दोघांनाही पोलिसांनी अटक केली. अटकेनंतर या दोघांनाही रविवारी दुपारी वांद्रे येथील लोकल कोर्टात हजर करण्यात आले होते.

दोन्ही आरोपी मूळचे विरारचे रहिवाशी असून घरफोडीच्या गुन्ह्यांतील रेकॉर्डवरील गुन्हेगार आहे. मनोजविरुद्ध दहिसर, जुहू, समतानगर, बोरिवली, सांताक्रुज पोलीस ठाण्यात प्रत्येकी एक, विलेपार्ले, एमएचबी प्रत्येकी दोन, डी. एन नगर तीन अशा बारा तर मोहसीनविरुद्ध जुहू पोलीस ठाण्यात प्रत्येकी दोन, दिडोंशी एक, डी. एन नगर, विलेपार्ले प्रत्येकी तीन, एमएचबी चार आणि विरार पोलीस ठाण्यात एक अशा चौदा घरफोडी व एनडीपीएस गुन्ह्यांची नोंद आहे. त्यांच्या अटकेने अंधेरी पोलीस ठाण्यातील अन्य दोन घरफोडीच्या गुन्ह्यांची उकल करण्यात पोलिसांना यश आले आहे.