वांद्रे येथे अज्ञात वाहनाच्या धडकेने तरुणाचा मृत्यू

मुंबई क्राईम टाइम्स डॉट कॉम
२९ ऑक्टोंबर २०२४
मुंबई, – वांद्रे येथे भरवेगात जाणार्‍या एका अज्ञात वाहनाच्या धडकेने तबरेज अय्युब कुरेशी या तरुणाचा मृत्यू झाला तर त्याचा मित्र नौशाद नदीम शेख हा गंभीररीत्या जखमी झाला. जखमी नौशादवर भाभा हॉस्पिटलमध्ये उपचार सुरु आहे. याप्रकरणी वांद्रे पोलिसांनी अपघाताची नोंद केली आहे. अपघातानंतर वाहनचालक पळून गेल्याने त्याचा पोलिसांकडून शोध सुरु आहे.

हा अपघात शनिवारी रात्री अकरा वाजता वांद्रे येथील वेस्टर्न एक्सप्रेस हायवे, माहीमकडे जाणार्‍या रस्त्यावर झाला. नौशाद नदीम शेख हा वांद्रे येथील बेहरामनगर, नार्थ लाईन, भाले साहाब गल्लीत राहत असून डिलीव्हरी बॉय म्हणून काम करतो. मृत तबरेज हा त्याचा मित्र असून तोदेखील याच परिसरात राहतो. शनिवारी रात्री अकरा वाजता ते दोघेही त्याच्या स्कूटीमध्ये पेट्रोल भरण्यासाठी जात होते. यावेळी नौशाद हा स्कूटी चालवत होता तर तबरेज हा त्याच्या मागे बसला होता. ही स्कूटी वेस्टर्न एक्सप्रेस हायवेहून माहीमच्या दिशेने जाणार्‍या रस्त्याने जात होती. यावेळी मागून भरवेगात जाणार्‍या एका अज्ञात वाहनाने त्यांच्या स्कूटीला जोरात धडक दिली. त्यामुळे त्यांची स्कूटी स्लीप होऊन ते दोघेही जखमी झाले. तबरेजच्या डोक्यावरुन वाहनाचे चाक गेल्याने तो गंभीररीत्या जखमी झाला होता. अपघाताची माहिती मिळताच वांद्रे पोलिसांनी घटनास्थळी धाव घेतली होती.

जखमी तबरेजला सायन तर नौशादला भाभा हॉस्पिटलमध्ये पोलिसांनी दाखल केले होते. तिथे तबरेजला डॉक्टरांनी मृत घोषित केले तर नौशादवर उपचार सुरु केले होते. नौशादच्या जबानीवरुन हा प्रकार उघडकीस आल्यानंतर वांद्रे पोलिसांनी अज्ञात वाहनचालकाविरुद्ध हलगर्जीपणाने वाहन चालवून एका तरुणाच्या मृत्यूस कारणीभूत तसेच दुसर्‍या गंभीर दुखापत होण्यास कारणीभूत ठरल्याप्रकरणी गुन्हा दाखल केला होता. अपघातानंतर वाहनचालक पळून गेल्याने त्याच्या अटकेसाठी पोलिसांनी विशेष मोहीम हाती घेतली आहे.