अज्ञात वाहनाच्या धडकेने 38 वर्षांच्या व्यक्तीचा मृत्यू
अपघातानंतर पळून गेलेल्या चालकाला अटक
मुंबई क्राईम टाईम्स डॉट कॉम
14 मे 2025
मुंबई, – भरवेगात जाणार्या एका अज्ञात वाहनाच्या धडकेने टुनटुनकुमार शाह या 38 वर्षांच्या व्यक्तीचा मृत्यू झाला. वांद्रे येथील अपघातानंतर आरोपी चालक घटनास्थळाहून पळून गेला होता. मात्र या चालकाला काही तासांत वांद्रे पोलिसांनी अटक केली. त्याच्याविरुद्ध वांद्रे पोलिसांनी अपघातप्रकरणी गुन्हा दाखल केला आहे.
हा अपघात रविवारी सायंकाळी पाच वाजता वांद्रे येथील टोलप्लाझाजवळील राजीव गांधी सागरी सेतू नाका बसस्टॉपसमोरील वरळीकडून खेरवाडीकडे जाणार्या नॉर्थ बॉण्डवर झाल्याचे पोलिसांनी सांगितले. देवेंद्र बबन कांबळे हे ठाण्यातील वागळे इस्टेट परिसरात राहत असून सध्या वांद्रे पोलीस ठाण्यात पोलीस हवालदार म्हणून कार्यरत आहेत. रविवारी सायंकाळी ते त्यांच्या सहकार्यासोबत वांद्रे येथील लालमट्टी परिसरात गस्त घालत होते. यावेळी त्यांना मुंबई पोलिसांच्या कंट्रोल रुममधून वांद्रे-वरळी सी लिंकवर अपघात झाला असून पोलीस मदत हवी आहे असा कॉल आला होता. त्यानंतर ते त्यांच्या सहकार्यासोबत तिथे रवाना झाले होते.
घटनास्थळी गेल्यानंतर त्यांना एक व्यक्ती गंभीररीत्या जखमी पडल्याचे दिसून आले. त्यामुळे त्याला पोलिसांनी तातडीने जवळच्या भाभा हॉस्पिटलमध्ये दाखल केले होते. तिथे त्याला डॉक्टरांनी मृत घोषित केले. प्राथमिक तपासात मृत व्यक्तीचे नाव टुनटुन शाह असल्याचे उघडकीस आले. रस्त्यावर जात असताना त्याला भरवेगात जाणार्या एका अज्ञात वाहनाने धडक दिली होती. अपघातानंतर जखमी व्यक्तीला कुठलीही वैद्यकीय मदत किंवा पोलिसांना अपघाताची माहिती न देता आरोपी चालक तेथून पळून गेला होता.
याप्रकरणी देवेंद्र कांबळे यांच्या तक्रारीवरुन पोलिसांनी अज्ञात वाहनचालकाविरुद्ध हलगर्जीपणाने वाहन चालवून एका व्यक्तीच्या मृत्यूस कारणीभूत ठरल्याप्रकरणी गुन्हा दाखल केला होता. सी लिंकवरील सीसीटिव्ही फुटेजच्या मदतीने पळून गेलेल्या वाहनचालकाचा पोलिसांकडून शोध सुरु केला होता. ही शोधमोहीम सुरु असताना काही तासांत पळून गेलेल्या चालकाला वांद्रे पोलिसांनी अटक केली.
