झोपेत अंगावरुन जेसीबी गेल्याने महिलेचा जागीच मृत्यू

मुंबई क्राईम टाईम्स डॉट कॉम
28 डिसेंबर 2025
मुंबई, – रात्री उशिरा चिंबई मैदानात झोपेत अंगावरुन जेसीबी गेल्याने एका महिलेचा जागीच मृत्यू झाल्याची घटना वांद्रे परिसरात घडली. मृत महिलेची ओळख पटली नसून तिची ओळख पटावी यासाठी पोलिसांनी प्रयत्न सुरु केले आहे. याप्रकरणी वांद्रे पोलिसांनी अपघाताची नोंद करुन आरोपी जेसीबी चालक मोहम्मद सलीम नूर खान याला अटक केली आहे. अटकेनंतर त्याला जामिानावर सोडून देण्यात आले आहे.

हा अपघात शनिवारी पहाटे चार वाजता वांद्रे येथील चिंबई मैदानाच्या आत साधारण वीस फुट अंतरावर झाला. भरतलाल जयस्वाल हे परळ येथे राहत असून सध्या वांद्रे पोलीस ठाण्यात पोलीस शिपाई म्हणून कार्यरत आहेत. शुक्रवारी रात्री ते बीट मार्शल म्हणून परिसरात गस्त घालत होते. यावेळी चिंबई मैदानात एक अपघात झाला असून जखमी महिलेला मदतीची गरज आहे असा कॉल मुंबई पोलिसांच्या कंट्रोल रुममधून प्राप्त झाला होता. घटनास्थळी गेल्यानंतर पोलिसांना तिथे गर्दी असल्याचे दिसून आले. या ठिकाणी एक महिला जखमी अवस्थेत पडली होती, त्यामुळे तिला तातडीने जवळच्या भाभा हॉस्पिटलमध्ये दाखल करण्यात आले होते. तिथे तिला डॉक्टरांनी मृत घोषित केले.

मृत महिलेची ओळख पटली नाही. तिची ओळख पटेल अशी कोणतीही वस्तू सापडली नाही. त्यामुळे तिचा मृतदेह नंतर शवविच्छेदनासाठी पाठविण्यात आला होता. प्राथमिक तपासात ही महिला रात्रीच्या वेळेस चिंबई मैदानात झोपली होती. याच दरम्यान तिथे आरोपी जेसीबी घेऊन आला होता. जेसीबी मागे घेत असताना त्याला मैदानात झोपलेल्या महिलेचा अंदाज आहे. त्यामुळे त्याने जेसीबी तिच्या अंगावरुन नेली होती. त्यात ती महिला गंभीररीत्या जखमी झाली होती. हॉस्पिटलमध्ये उपचार मिळण्यापूर्वीच तिला डॉक्टरांनी मृत घोषित केले होते. या जेसीबी चालकाला लोकांनी पकडून पोलिसांच्या स्वाधीन केले.

याप्रकरणी भरतलाल जयस्वाल यांच्या तक्रारीवरुन पोलिसांनी चालक मोहम्मद सलीम याच्याविरुद्ध जेसीबी हलगर्जीपणाने चालवून एका वयोवृद्ध महिलेच्या मृत्यूस कारणीभूत ठरल्याप्रकरणी गुन्हा दाखल केला होता. याच गुन्ह्यांत नंतर त्याला पोलिसांनी अटक केली. अटकेनंतर त्याला जामिनावर सोडून देण्यात आले होते. दरम्यान मृत महिलेची ओळख पटली नसल्याने तिची ओळख पटावी यासाठी पोलिसांनी प्रयत्न सुरु केले आहे.