अभिनेत्याच्या कॅफे शॉपवर जनरल मॅनेजरचा 35 लाखांचा डल्ला

मुंबई क्राईम टाइम्स डॉट कॉम
25 सप्टेंबर 2025
मुंबई, – वांद्रे येथील एका अभिनेत्याच्या ग्राऊंडेड कॅफे शॉपवर त्याच्याच जनरल मॅनेजरने सुमारे 35 लाखांचा डल्ला मारल्याचा प्रकार उघडकीस आला आहे. याप्रकरणी कॅफेचा जनरल मॅनेजर असलेल्या अजयसिंग भरतसिंग रावत याच्याविरुद्ध वांद्रे पोलिसांनी अपहारासह फसवणुकीचा गुन्हा नोंदवून तपास सुरु केला आहे. याच गुन्ह्यांत त्याची पोलिसांकडून लवकरच चौकशी करुन जबानी नोंदविण्यात येणार आहे. या जबानीनंतर त्याच्याविरुद्ध योग्य ती कायदेशीर कारवाई केली जाईल असे पोलिसांकडून सांगण्यात आले.

अभिनेता असलेला जिब्रान फिरोज खान हा वांद्रे येथील 28 वा रोड, गुरु नानक पार्कसमोरील ज्योती सदन अपार्टमेंटमध्ये राहतो. त्याचे वडिल फिरोज खान हे अभिनेते असून बी. आर चौप्रा यांच्या बहुचर्चित महाभारत या मालिकेत त्यांनी अर्जुनची भूमिका साकारली होती. त्यानंतर त्यांनी अनेक हिंदी चित्रपटात काम केले होते. जिब्रानच्या मालकीचे वांद्रे येथील माऊंट मेरीजवळ ग्राऊंडेड नावाचे एक प्रसिद्ध कॅफे शॉप आहे. जून 2022 पासून तिथे अजयसिंग हा जनरल मॅनेजर म्हणून काम करत होता. त्यामुळे त्यांनी त्याच्यावर संपूर्ण कॅफेची जबाबदारी सोपविली होती. अधूनमधून ते कॅफेमधील व्यवहाराची पाहणी करत होते.

कॅफेमध्ये येणार्‍या ग्राहकांकडून ऑनलाईन आणि कार्डद्वारे पेमेंट थेट त्यांच्या हॉटेलच्या बँक खात्यात जमा होत होते तर कॅश स्वरुपात आलेले पेमेंट अजयसिंग हा नंतर बँकेत जमा करत होता. याबाबत तो त्यांना सतत अपडेट करत होता. 19 सप्टेंबरला त्यांच्या कॅफेचा मॅनेजर प्रमोद यांनी फोन करुन त्यांना कॅफेला माल पुरविणार्‍या विक्रेत्यांना त्यांच्या मालाचे पेमेंट मिळत नसल्याची तक्रार केली होती. अजयसिंग यांच्याकडे वारंवार विचारणा करुनही ते पेमेंट करत नाही, त्यामुळे या संपूर्ण प्रकरणाकडे त्यांनी जातीने लक्ष घालावे अशी विनंती केली होती. 22 सप्टेंबरला त्यांनी अजयसिंगकडे विचारणा केली होती. यावेळी त्याने त्यांना टाळण्याचा प्रयत्न केला होता. त्याची वागणुक संशयास्पद होती. त्यामुळे त्यांनी बँक खात्यासह कॅफेमधील विक्रीचे ऑडिटचे आदेश दिले होते.

ऑडिटदरम्यान 1 एप्रिल 2024 ते 31 मार्च 2025 या कालावधीत कॅफेमध्ये 1 कोटी 14 लाख 67 हजार रुपयांची रोख विक्री झाली होती. मात्र बँकेत 79 लाख 67 हजार 110 रुपये जमा झाले होते. उर्वरित रक्कम 34 लाख 99 हजार 940 रुपये अजयसिंग याने बँकेत जमा केले नव्हते. त्यामुळे त्यांनी अजयसिंगला कॉल करुन विचारणा केली होती, मात्र त्याने त्यांना प्रतिसाद दिला नाही. नंतर त्याने त्यांचे कॉल ब्लॉक केले होते. कॅफेचा संपूर्ण व्यवहाराची जबाबदारी असताना अजयसिंगने सुमारे 35 लाखांचा वैयक्तिक कारणासाठी वापर करुन कॅफेची फसवणुक केली होती.

हा प्रकार उघडकीस येताच त्यांनी वांद्रे पोलीस ठाण्यात अजयसिंग रावत याच्याविरुद्ध तक्रार केली होती. या तक्रारीची शहानिशा केल्यानंतर त्याच्याविरुद्ध पोलिसांनी अपहारासह फसवणुकीचा गुन्हा दाखल केला आहे. या गुन्ह्यांचा तपास सुरु असून अजयसिंगची पोलिसांकडून लवकरच चौकशी होणार आहे.