सोळाव्या मजल्यावरुन उडी घेऊन महिलेची आत्महत्या

मुंबई क्राईम टाईम्स डॉट कॉम
17 जुलै 2025
मुंबई, – वांद्रे येथील शासकीय वसाहतीत राहणार्‍या शीतल सतीश पवार या महिलेने आपल्या निवासी इमारतीच्या सोळाव्या मजल्यावररुन उडी घेऊन आत्महत्या केल्याची घटना उघडकीस आली आहे. याप्रकरणी शीतलचा पती सतीश पवार याच्याविरुद्ध खेरवाडी पोलिसांनी आत्महत्येस प्रवृत्त केल्याप्रकरणी गुन्हा दाखल केला असून याच गुन्ह्यांत नंतर त्याला पोलिसांनी अटक केली. अटकेनंतर त्याला वांद्रे येथील लोकल कोर्टाने पोलीस कोठडी सुनावली आहे. कौटुंबिक वादातून सतीशकडून होणार्‍या मानसिक व शारीरिक छळाला कंटाळून शीतलने आत्महत्या केल्याचे पोलीस तपासात उघडकीस आले आहे.

ही घटना बुधवारी दुपारी पावणेतीन वाजता वांद्रे येथील शासकीय वसाहतीत घडली. या इमारतीच्या सोळाव्या मजल्यावर सतीश हा त्याची पत्नी शीतलसोबत राहत होता. चार वर्षांपूर्वी त्यांचा विवाह झाला होता. मात्र लग्नानंतर त्यांच्यात सतत कौटुंबिक खटके उडत होते. त्यात पतीकडून होणार्‍या मानसिक व शारीरिक शोषणाला शीतल ही कंटाळून गेली होती. गेल्या काही दिवसांत तिला प्रचंड मानसिक नैराश्य आले होते. त्यातून तिने बुधवारी दुपारी तिच्या निवासी इमारतीच्या सोळाव्या मजल्यावरुन उडी घेतली होती. स्थानिक रहिवाशांकडून ही माहिती प्राप्त होताच खेरवाडी पोलिसांनी घटनास्थळी धाव घेतली होती. तिला तातडीने जवळच्या शासकीय हॉस्पिटलमध्ये दाखल करण्यात आले होते. मात्र तिथे तिला डॉक्टरांनी मृत घोषित केले.

चौकशीदरम्यान शीतलचा सतीशकडून मानसिक व शारीरिक शोषण सुरु होते. या त्रासाला कंटाळूनच तिने आत्महत्या केल्याचे उघडकीस आले होते. याप्रकरणी शीतलच्या कुटुंबियांकडून आलेल्या तक्रारीनंतर सतीशविरुद्ध पोलिसांनी पत्नीचा मानसिक व शारीरिक शोषण करुन तिला आत्महत्या करण्यास प्रवृत्त केल्याप्रकरणी गुन्हा दाखल केला होता. गुन्हा दाखल होताच त्याला पोलिसांनी अटक केली. अटकेनंतर त्याला गुरुवारी दुपारी वांद्रे येथील लोकल कोर्टात हजर करण्यात आले होते. यावेळी कोर्टाने त्याला पोलीस कोठडी सुनावली आहे. दरम्यान शीतलच्या आत्महत्येने स्थानिक रहिवाशांमध्ये प्रचंड शोककळा पसरली होती.