बोगस दस्तावेज सादर करुन बँकेला सव्वातीन कोटींना गंडा

मुंबई क्राईम टाईम्स डॉट कॉम
13 जून 2025
मुंबई, – प्रॉपटीचे बोगस दस्तावेज एका नामांकित बँकेत सादर करुन बँकेकडून घेतलेल्या कर्जाची परतफेड न करता सुमारे सव्वातीन कोटींची फसवणुक झाल्याचा धक्कादायक प्रकार अंधेरी परिसरात उघडकीस आला आहे. याप्रकरणी एकाच कुटुंबातील तिघांविरुद्ध अंधेरी पोलिसांनी बोगस दस्तावेज सादर करुन बँकेची फसवणुक केल्याप्रकरणी गुन्हा दाखल केला आहे. रमाकांत शंकरमल पिलानी, रौनक रमाकांत पिलानी आणि मंजुदेवी रमाकांत पिलानी अशी या तिघांची नावे असल्याचे पोलिसांनी सांगितले. या तिघांना लवकरच पोलिसांकडून चौकशीसाठी हजर राहण्याचे समन्स बजाविले जाणार आहे.

प्रितेश दिवेशकुमार भट हे कांदिवलीतील इराणीवाडीत राहत असून एका नामांकित बँकेत सेल्स मॅनेजर म्हणून कामाला आहेत. त्यांच्या अंधेरीतील बँकेच्या शाखेत अग्रवाल बल्क अ‍ॅक्टिवस प्रायव्हेट लिमिटेड कंपनीचे एक करंट खाते असून या कंपनीचे मालक व संचालक रमाकांत पिलानी आहेत. त्यामुळे ते त्याच्या चांगल्या परिचित आहेत. 2016 साली रमाकांतने त्यांच्या बँकेकडून 2 कोटी 90 लाख रुपयांचे गृहकर्ज घेतले होते. त्याचे नियमित हप्ते भरत असल्याने त्यांना त्याच्यावर विश्वास होता. डायरेक्ट मार्केटिंग एजन्सी आणि रियल व्हॅल्यू कंपनीचे संबंधित बँकेशी टायअप आहे. त्यामुळे ज्या व्यवसायिकांना बँकेतून कर्जाची आवश्यकता असते, अशा व्यावसायिकांना त्यांची बँक कर्ज देते.

दोन वर्षांपूर्वी या नियमानुसार रमाकांतने त्यांच्या बँकेत चार कोटीच्या कर्जासाठी अर्ज केला होता. त्यासाठी त्यांनी त्यांच्या फ्लॅटसह इतर प्रॉपटी तारण ठेवण्याची तयारी दर्शविली होती. या सर्व दस्तावेजाची तपासणी केल्यानंतर बँकेने रमाकांतला 25 ऑक्टोंबर 2023 रोजी तीन कोटीचे कर्ज मंजूर करुन कर्जाची ही रक्कम त्यांच्या बँक खात्यात ट्रान्स्फर केली होती. या कर्जासाठी त्याने अंधेरीतील जे. बी नगर, गुरुदत्त सहकारी सोसायटीच्या ए/2, ए/4, बी/3 आणि बी/4 या चार फ्लॅटचे दस्तावेज तारण म्हणून जमा केले होते. ही सर्व प्रॉपटी रौनक पिलानी याच्या मालकीची होती.

मार्च 2024 पर्यंत त्याने कर्जाचे नियमित हप्ते भरले होते. मात्र नंतर त्याने कर्जाचे हप्ते भरणे बंद केले होते. याबाबत बँकेकडून रमाकांत आणि रौनक यांच्याकडे विचारणाकरण्यात आली होती. यावेळी या दोघांनी आपण बँकेतून कुठलेही कर्ज घेतले नाही. तसेच बँकेत जमा केलेल्या दस्तावेजावर रौनकने त्याची स्वाक्षरी नसल्याचे सांगितले होते. या घटनेची बँकेच्या वरिष्ठ अधिकार्‍यांनी गंभीर दखल घेत कर्जासाठी देण्यात आलेल्या दस्तावेजाची पुन्हा शहानिशा करण्याचे आदेश लिे होते.

त्यात रमाकांतने त्याच्या सोसायटीची दिलेली एनओसी आणि रुम बदल्याचे दिलेले पत्र बोगस असल्याचे उडकीस आले. तसेच रौनकच्या स्वाक्षरीमध्ये मोठी तफावत होती. कर्जाची रक्कम त्याने जीबीएस केमिकल लिमिटेड या कंपनीच्या नावे असलेल्या कर्जाची परतफेड करण्यासाठी घेतली होती. 2 कोटी 92 लाख रुपयांचे त्याने कर्ज फेडले होते. तपासात रमाकांतने त्यांचा मुलगा रौनक आणि पत्नी मंजुदेवी यांच्या प्रॉपटीचे बोगस दस्तावेज तारण म्हणून ठेवता त्यांची स्वाक्षरी करुन कर्ज घेतले होते. त्यासाठी त्याने बोगस एनओसी आणि रुम क्रमांक बदल्याचे बोगस पत्र बँकेत सादर केले होते.

अशा प्रकारे पिलानी कुटुंबियांनी बँकेची सुमारे सव्वातीन कोटीची फसवणुक केली होती. हा प्रकार उघडकीस येताच बँकेच्या वतीने प्रितेश भट यांनी अंधेरी पोलिसांत तक्रार केली होती. या तक्रारीची शहानिशा केल्यानंतर रमाकांत पिलानी, रौनक पिलानी आणि मंजुदेवी पिलानी या तिघांविरुद्ध पोलिसांनी बोगस दस्तावेज सादर करुन बँकेतून कर्ज घेऊन कर्जाची परतफेड न करता बँकेची सुमारे सव्वातीन कोटीची फसवणुक केल्याप्रकरणी गुन्हा दाखल केला आहे. या गुन्ह्यांचा तपास सुरु असून या तिघांची पोलिसांकडून लवकरच चौकशी होणार आहे.