विनाचालक ट्रकच्या धडकेने 33 वर्षांच्या व्यक्तीचा मृत्यू

मुंबई क्राईम टाइम्स डॉट कॉम
19 फेब्रुवारी 2025
मुंबई, – विनाचालक ट्रकच्या धडकेने साजिद अखलाख आझमी या 33 व्यक्तीचा मृत्यू झाल्याचा घटना भांडुप परिसरात घडली. पार्क केलेला ट्रक अचानक सुरु झाल्याने ट्रकची समोरुन येणार्‍या स्कूटीला धडक लागून हा विचित्र अपघात झाल्याचे उघडकीस आले आहे. याप्रकरणी भांडुप पोलिसांनी अज्ञात ट्रकचालकाविरुद्ध गुन्हा नोंदवून तपास सुरु केला आहे. चालक पळून गेल्याने त्याचा पोलिसांकडून शोध सुरु आहे.

हा अपघात मंगळवारी रात्री उशिरा पाऊणच्या सुमारास भांडुप येथील लालबहादूर शास्त्रीवरुन मंगतराम पेट्रोलपंपाकडून उजवीकडील रस्त्यावर झाला. शाहरुख अब्दुल्ला चौधरी हा भांडुप येथे राहत असून तो एका लॉजिस्टिकमध्ये कामाला आहे. साजिद हा त्याचा मित्र असून तो भांडुपच्या पठाण कॉलनी, आमीर मिस्त्री चाळीत राहतो. ते दोघेही रात्री जेवण झाल्यानंतर वॉकिंगसाठी जातात. मंगळवारी रात्री सव्वाबारा वाजता शाहरुखला मंगतराम पेट्रोलपंप जंक्शनजवळ साजिद आणि जैद शेख हे वॉक करताना दिसले होते. त्यानंतर ते तिघेही त्याच्या स्कूटीवरुन आईस्क्रिम खाण्यासाठी निघाले होते. रात्री पाऊणच्या सुमारास ते तिघेही मंगतराम पेट्रोलपंप येथून जात होते. यावेळी त्यांना त्यांच्या दिशेने एक ट्रक येत असल्याचे दिसून आले. या ट्रकमध्ये चालक नव्हता. ट्रकची स्कूटीला धडक लागण्यापूर्वीच शाहरुखने उजव्या तर झेदने डाव्या बाजूला उडी घेतली होती, मात्र साजिदचा पाय स्कूटीमध्ये अडकल्याने त्याला बाजूला होता आले नाही. त्यामुळे ट्रकने स्कूटीला धडक दिली. त्यात ट्रकच्या टायरखाली आल्याने साजिद हा गंभीररीत्या जखमी झाला होता.

जखमी झालेल्या साजिदला या दोघांनी तातउीने भांडुपच्या क्रिटीकेअर हॉस्पिटलमध्ये दाखल केले. तिथे त्याच्यावर उपचार सुरु होते. मात्र उपचारादरम्यान त्याचा मृत्यू झाला. अपघाताची माहिती भांडुप पोलिसांनी घटनास्थळी धाव घेतली होती. याप्रकरणी शाहरुखची पोलिसांनी जबानी नोंदवून घेतली होती. ट्रकचालकाने योग्य ती काळजी न घेता ट्रक पार्क केला होता, त्यात अचानक ट्रक सुरु झाल्याने स्कूटीला धडक देऊन साजिदच्या छातीवर टायर गेल्याने त्याचा मृत्यू झाला होता. त्यामुळे शाहरुखच्या जबानीनंतर आरोपी ट्रकचालकाविरुद्ध पोलिसांनी हलगर्जीपणाने ट्रक पार्क करुंन एका व्यक्तीच्या मृत्यूस कारणीभूत ठरल्याप्रकरणी गुन्हा दाखल केला होता. चालक फरार असल्याने त्याचा पोलिसांकडून शोध सुरु आहे. भांडुप परिसरात झालेल्या या विचित्र अपघातात साजिदच्या मृत्यूचे वृत्त समजताच स्थानिक रहिवाशांमध्ये प्रचंड शोककळा पसरली होती.