बीट कॉईन गुंतवणुकीच्या बहाण्याने महिलेची फसवणुक

मुंबई क्राईम टाइम्स डॉट कॉम
23 जानेवारी 2026
मुंबई, – बीट कॉईन गुंतवणुकीवर चांगला परतावा देण्याचे आमिष दाखवून एका महिलेची अज्ञात सायबर ठगांनी सुमारे पावणेतेरा लाखांची फसवणुक केल्याचा प्रकार अंधेरी परिसरात उघडकीस आला आहे. याप्रकरणी अज्ञात सायबर ठगाविरुद्ध पश्चिम प्रादेशिक सायबर सेल पोलिसांनी फसवणुकीसह आयटी कलमांतर्गत गुन्हा दाखल केला आहे. सोशल मिडीयावर साडीच्या जाहिरातीची लिंक अपलोड करुन बीट कॉईनमध्ये गुंतवणुक करण्यास प्रवृत्त करुन या ठगांनी आतापर्यंत अनेकांना गंडा घातल्याचे तपासात उघडकीस आले आहे. त्यामुळे या गुन्ह्यांतील आरोपींच्या अटकेसाठी सायबर सेल पोलिसांनी विशेष मोहीम हाती घेतली आहे.

वर्षां अरविंद पाटकर ही महिला अंधेरी येथे राहते. ती एका खाजगी कंपनीत सहाय्यक अंकाऊंट तर तिचा मुलगा आयटी इंजिनिअर म्हणून कामाला आहे. 29 जूनला ती तिच्या घरी होती, सोशल मिडीयाचा वापर करताना तिला साडीची जाहिरातीची एक लिंक दिसली होती. ही लिंक ओपन केल्यानंतर तिला पैठणी नावाच्या एका व्हॉटअप ग्रुपमध्ये अ‍ॅड करण्यात आले होते. या ग्रुपमधील सभासद बीट कॉईनमध्ये गुंतवणुक करत होते, या गुंतवणुकीवर त्यांना चांगला फायदा होत असल्याचे तिच्या निदर्शनास आले होते. याच ग्रुपमध्ये एका सभासदाने बीट कॉईनमध्ये कशा प्रकारे गुंतवणुक करावी, त्यातून त्यांना किती फायदा होईल याबाबतची एक माहिती दिली होती.

या माहितीसोबत एक लिंक होती. तिने ती लिंक ओपन केली होती. काही दिवसांनी ग्रुप अ‍ॅडमिनने कॉल करुन तिला बीट कॉईनमध्ये गुंतवणुकीचा सल्ला देताना त्यातून तिला चांगला फायदा होईल असे आमिष दाखविले होते. त्यामुळे तिने सुरुवातीला काही रक्कम गुंतवणूक केली होती, या गुंतवणुकीवर तिला खरोखरच चांगला फायदा झाला होता. त्यामुळे तिने बीट कॉईनमध्ये गुंंतवणुकीचा निर्णय घेतला होता. जून 2025 ते जानेवारी 2026 या कालावधीत तिने तिच्यासह तिच्या बहिणी आणि दोन मैत्रिणीच्या अकाऊंटमधन गुगल पे आणि एनईएफटीद्वारे सुमारे पावणेतेरा लाखांची गुंतवणुक केली होती.

या गुंतवणुकीवर तिला काही दिवसांत एक कोटीचा फायदा झाला होता. त्यामुळे तिने ती रक्कम तिच्या बँक खात्यात ट्रान्स्फर करण्याचा प्रयत्न केला, मात्र वारंवार प्रयत्न करुनही तिला ती रक्कम ट्रान्स्फर करता आली नाही. त्यामुळे तिने कस्टमर केअरला कॉल केला होता. यावेळी तिला ही रक्कम ट्रान्स्फर करण्यासाठी आधी टॅक्स भरावा लागेल असे सांगण्यात आले. संबंधित व्यक्ती तिला सतत टॅक्ससह इतर चार्जेस भरण्यास सांगत होते.

हा प्रकार संशयास्पद वाटताच तिने तिच्या मैत्रिणीसोबत चर्चा केली होती. यावेळी त्यांनी तिची फसवणुक झाल्याचे सांगून तिला पोलिसांत तक्रार करण्याचा सल्ला दिला होता. त्यामुळे तिने पश्चिम प्रादेशिक विभागाच्या सायबर सेल पोलिसांत तक्रार केली होती. या तक्रारीची पोलिसांनी गंभीर दखल घेत संबंधित सायबर ठगाविरुद्ध फसवणुकीसह आयटी कलमांतर्गत गुन्हा दाखल केला आहे. या गुन्ह्यांचा तपास सुरु असल्याचे पोलिसांनी सांगितले.