एअर इंडियाच्या न्यूयॉर्क विमानात बॉम्बची धमकी
टिश्यू पेपरमध्ये बॉम्बस्फोटाचा मजकूर ठेवला होता
मुंबई क्राईम टाईम्स डॉट कॉम
11 मार्च 2025
मुंबई, – न्यूयॉर्कला जाणार्‍या एअर इंडियाच्या विमानात बॉम्ब असून लॅडिंगदरम्यान या बॉम्बचा स्फोट होणार असल्याचा संदेश टिश्यू पेपरमध्ये लिहून अज्ञात व्यक्तीने दहशतीचे वातावरण निर्माण करण्याचा प्रयत्न केला. मात्र संपूर्ण विमानाची तपासणी केल्यानंतर बॉम्बची ती अफवा असल्याचे उघडकीस आले आहे. या घटनेनंतर एअर इंडियाच्या वतीने सहार पोलीस ठाण्यात अज्ञात व्यक्तीविरुद्ध तक्रार करण्यात आली आहे. या तक्रारीनंतर पोलिसांनी गुन्हा नोंदवून बॉम्बस्फोट होणार असल्याची खोटी माहिती देऊन दहशतीचे वातावरण निर्माण केल्याप्रकरणी गुन्हा दाखल केला आहे. या गुन्ह्यांचा सहार पोलिसांसह गुन्हे शाखेचे अधिकारी संमातर तपास करत आहेत.
चेरमी मेरी लॅमिन हे गोरेगाव येथील रॉयल पाम्स, डायमंड अस्ले एकमध्ये राहत असून एअर इंडियामध्ये कामाला आहेत. सोमवारी रात्री पावणेदोन वाजता एअर इंडियाचे एक विमान छत्रपती शिवाजी महाराज आंतरराष्ट्रीय विमानतळावरुन न्यूयॉर्कसाठी रवाना झाले होते. प्रवासादरम्यान चेरसी लॅमिन हे विमानातील एल-तीन येथील बाथरुममध्ये चेकींग करत होते. यावेळी त्यांना तिथे एक टिश्यू पेपर सापडला. त्यात बॉम्ब इन कार्गो-59 मिनिट असा मजकूर लिहिल्याचे दिसून आले.
याच विमानातून प्रवास करणार्‍या महिला व्हिक्टोरिया पेट्रोवस्की यांनाही असाच एक टिश्यू पेपर सापडला होता. तो टिश्यू पेपर तिने केबीन क्रुजॉसलिन कोरडेरो यांना दिला होता. तो पेपरला तिला एल-4 च्या बाथरुमच्या बेसिनवर सापडला होता. त्या पेपरच्या पहिल्या बाजूला सीटी2025 विनर फ्लाईट कार्गो मे बॉम्ब है. हॅप्पी दिवाळी तर दुसर्‍या बाजूला लॅडिंग मै फटेगा इन्साल्लाह असा मजकूर लिहिला होता. या घटनेने विमानातील प्रवाशांसह कर्मचारी आणि अधिकार्‍यांमध्ये प्रचंड तणावाचे वातावरण निर्माण झाले होते.
एअर इंडियाचे विमान उड्डान होण्यापूर्वीच अज्ञात व्यक्तीने जाणूनबुजून एल-3 आणि एल-4 बाथरुममध्ये बॉम्ब असलेला टिश्यू पेपर ठेवून दहशतीचे वातावरण निर्माण करण्याचा प्रयत्न केला होता. या घटनेची एअर इंडियाच्या वरिष्ठ अधिकार्‍यांनी गंभीर दखल घेत चेरमी लॅमिन यांना सहार पोलिसांत तक्रार करण्याचा सल्ला दिला होता. त्यानंतर त्यांनी एअर इंडियाच्या वतीने पोलिसांत तक्रार केली होती. या तक्रारीनंतर अज्ञात व्यक्तीविरुद्ध पोलिसांनी सार्वजनिक शांततेचा भंग करुन भितीदायक व दहशतीचे वातावरण निर्माण केल्याप्रकरणी गुन्हा दाखल केला आहे. या गुन्ह्यांचा सहार पोलिसांसह स्थानिक गुन्हे शाखेकडून तपास सुरु आहे.
