टेम्पो अपघातात जखमी झालेल्या तरुणाचा मृत्यू

मुंबई क्राईम टाइम्स डॉट कॉम
22 मार्च 2025
मुंबई, – गेल्या आठवड्यात टेम्पोची रिक्षाला धडक लागून अपघातात जखमी झालेल्या सुनिल राजेंद्र विश्वकर्मा या 25 वर्षांच्या तरुणाचा मृत्यू झाला. अपघातानंतर टेम्पोचालक घटनास्थळाहून पळून गेला असून त्याच्याविरुद्ध एमएचबी पोलिसांनी गुन्हा दाखल केला आहे. पळून गेलेल्या टेम्पोचालकाचा पोलिसाकडून शोध सुरु आहे.

हा अपघात 13 मार्चला रात्री नऊ वाजता बोरिवलीतील न्यू लिंक रोड, योगीनगर, हॉटेल पेटपूजासमोर झाल्याचे पोलिसांनी सांगितले राजेंद्र अच्छेलाल विश्वकर्मा हे नालासोपारा येथे राहत असून सुतारकाम करतात. गुरुवारी 13 मार्चला सकाळी दहा वाजता ते त्यांचा मुलगा सुनिलसोबत बोरिवलीतील न्यू लिंक रोड, योगीनगर, माधव मार्बल स्टोरमध्ये कामासाठ आले होते. दिवसभर काम केल्यानंतर रात्री नऊ वाजता ते दोघेही त्यांच्या घरी जाण्यासाठी निघाले होते. ऑरा हॉटेल, पूजा वाईन्स शॉपसमोर शेअरिंग रिक्षा स्टॅण्टवर आल्यानंतर ते रिक्षात बसून बोरिवली रेल्वे स्थानकाच्या दिशेने जात होते.

याच दरम्यान भरवेगात समोरुन येणार्‍या एका टेम्पोने त्यांच्या रिक्षाला धडक दिली होती. या अपघातात त्यांचा मुलगा सुनिल हा गंभीररीत्या जखमी झाला होता. त्याच्या डोक्याला आणि पायाला गंभीर दुखापत झाली होती. त्यामुळे जखमी झालेल्या सुनिलला तातडीने कांदिवलीतील शताब्दी हॉस्पिटलमध्ये दाखल करण्यात आले होते. त्याची प्रकृती गंभीर असल्याने त्याला नंतर केईएम हॉस्पिटलमध्ये हलविण्यात आले होते. तिथे त्याच्यावर आयसीयूमध्ये उपचार सुरु होते. मात्र उपचारादरम्यान गुरुवारी 20 मार्चला सायंकाळी पावणेसहा वाजता त्याचा मृत्यू झाला होता. अपघातानंतर एमएचबी पोलिसांनी घटनास्थळी धाव घेतली होती.

याप्रकरणी राजेंद्र विश्वकर्मा यांच्या तक्रार अर्जावरुन पोलिसांनी आरोपी टेम्पोचालकाविरुद्ध हलगर्जीपणाने टेम्पो चालवून एका 25 वर्षांच्या तरुणाच्या मृत्यूस कारणीभूत ठरल्याप्रकरणी गुन्हा दाखल केला होता. अपघातानंतर टेम्पोचालक सुनिलला कुठलीही वैद्यकीय मदत किंवा अपघाताची माहिती न देता पळून गेला होता. त्यामुळे परिसरातील सीसीटिव्ही फुटेजच्या मदतीने पोलिसांनी पळून गेलेल्या टेम्पोचालकाचा शोध सुरु आहे.