टेम्पोच्या धडकेने पतीचा मृत्यू तर पत्नी जखमी

मुंबई क्राईम टाईम्स डॉट कॉम
15 जुलै 2025
मुंबई, – टेम्पोच्या धडकेने पतीचा मृत्यू झाला तर पत्नी जखमी झाल्याची घटना रविवारी चेंबूर परिसरात घडली. मृत व्यक्तीचे नाव शाहिद सलीम मंसुरी (36) असून अपघातात त्याची पत्नी इरम शाहिद अन्सारी ही जखमी झाली होती. तिच्यावर सायन हॉस्पिटलमध्ये उपचार सुरु आहे. अपघातानंतर टेम्पोचालक पळून गेला. त्यामुळे त्याच्याविरुद्ध नेहरुनगर पोलिसांनी गुन्हा नोंदवून त्याचा शोध सुरु केला आहे.

हा अपघात रविवारी सायंकाळी सात वाजता चेंबूर येथील ईस्टर्न एक्सप्रेस हायवे, अमर महल जंक्शनजवळील ब्रिजच्या उतरावरील दक्षिण वाहिनीवर झाला. सलीम इब्राहिम मंसुरी हे माटुंगा येथील लेबर कॅम्प परिसरात राहतात. मृत शाहिद हा त्यांचा मुलगा असून त्यांचा गॅस वेल्डिंगचा व्यवसाय आहे. 13 जुलैला रविवारी असल्याने शाहिदला सुट्टी होती. त्यामुळे त्याची पत्नी इरम ही तिच्या मानखुर्द येथील लल्लूभाई कंपाऊंडमधील तिच्या माहेरी गेली होती. सायंकाळी पाच ेवज्ञाजता शाहिद हा इरमला घरी आणण्यासाठी मानखुर्द येथे त्याच्या बाईकवरुन गेला होता. सात वाजता ते दोघेही त्यांच्या बाईकवरुन माटुंगा येथील घरी येण्यासाठी निघाले होते.

ही बाईक अमर महल जंक्शनजवळील दक्षिण वाहिनीवरुन जात होती. याच दरम्यान भरवेगात जाणार्‍या एका टेम्पोने त्यांच्या बाईकला धडक दिली होती. त्यात त्यांची बाईक स्लीप होऊन ते दोघेही जखमी झाले होते. अपघातातची माहिती मिळताच नेहरुनगर पोलिसांनी घटनास्थळी धाव घेतली होती. जखमी दोघांनाही पोलिसांनी तातडीने जवळच्या सायन हॉस्पिटलमध्ये दाख केले होते. तिथेच उपचार सुरु असताना रात्री साडेदहा वाजता शाहिदचा मृत्यू झाला. इरम ही जखमी झाल्याने तिच्यावर तिथे उपचार सुरु होते.

याप्रकरणी सलीम मंसुरी यांच्या जबानीवरुन पोलिसांनी टेम्पोचालकाविरुद्ध हलगर्जीपणाने टेम्पो चालवून एका व्यक्तीच्या मृत्यूस तर महिलेला गंभीर दुखापत होण्यास कारणीभूत ठरल्याप्रकरणी गुन्हा दाखल केला होता. अपघातानंतर चालक जखमींना कुठलीही वैद्यकीय मदत किंवा अपघाताची माहिती पोलिसांना न देता पळून गेला होता. त्यामुळे त्याचा पोलिसांकडून शोध सुरु आहे.