चेंबूर येथील 40 वर्षांच्या बाईकस्वाराचा मृत्यू

मुंबई क्राईम टाइम्स डॉट कॉम
13 ऑगस्ट 2025
मुंबई, – चेंबूर येथे भरवेगात जाणार्‍या एका बाईकने बाईकस्वाराला धडक दिल्याने झालेल्या अपघातात 40 वर्षांच्या बाईकस्वाराचा मृत्यू झाला. मोहम्मद हनीफ अमीर शेख असे या मृत बाईकस्वाराचे नाव असून त्याच्या मृत्यूप्रकरणी सोहेल रफिक खान या आरोपी बाईकस्वाराविरुद्ध टिळकनगर पोलिसांनी हलगर्जीपणाने मृत्यूस कारणीभूत ठरल्याप्रकरणी गुन्हा दाखल केला आहे.

हा अपघात गुरुवार 7 ऑगस्टला सायंकाळी साडेपाच वाजता चेंबूर येथील छेडानगर जंक्शन नवीन ब्रिजवर झाला. मोहम्मद हनीफ हा त्याच्या कुटुंबियांसोबत सायन येथील मुकूंदनगर, ताज रुग्णालयाजवळील शिवनेरी इमारतीमध्ये राहतो. गुरुवारी 7 ऑगस्टला सायंकाळी तो त्याच्या बाईकवरुन अमर महल येथून छेडानगर जंक्शन चढणीला नवीन ब्रिजवरुन जात होता. यावेळी मागून येणार्‍या दुसर्‍या बाईकस्वाराने त्याच्या बाईकला जोरात धडक दिली होती. या अपघातात ते दोघेही जखमी झाले होते. जखमी अवस्थेत असताना आरोपी बाईकस्वार तेथून पळून गेला होता. अपघाताची माहिती मिळताच टिळकनगर पोलिसांनी घटनास्थळी धाव घेतली होती. जखमी व्यक्तीला राजावाडी हॉस्पिटलमध्ये दाखल केले असता तिथे त्याला मृत घोषित करण्यात आले.

चौकशीअंती त्याचे नाव मोहम्मद हनी शेख असल्याचे उघडकीस आले. त्यानंतर त्याच्या अपघाती मृत्यूची माहिती त्याच्या कुटुंबियांना देण्यात आली होती. तपासात आरोपी बाईकस्वाराचे नाव सोहेल खान असून तो नवी मुंबईतील तळोजा फेज एक, इलाईट स्कूलजवळ राहतो. तो सुरक्षारक्षक म्हणून काम करतो. या अपघातात त्याच्या पायाला गंभीर दुखापत झाली होती. याप्रकरणी पोलीस हवालदार दिलीप आनंदराव खांडझोडे यांच्या तक्रारीवरुन पोलिसांनी सोहेल खान याच्याविरुद्ध हलगर्जीपणाने बाईक चालवून एका बाईकस्वाराच्या मृत्यूस कारणीभूत ठरल्याप्रकरणी गुन्हा दाखल केला आहे.