लिंकद्वारे छावा चित्रपट व्हायरलप्रकरणी पहिली कारवाई

मुंबई क्राईम टाईम्स डॉट कॉम
10 एप्रिल 2025
मुंबई, – देशभरात 1818 बोगस लिंकवरुन बहुचर्चित छावा चित्रपट प्रदर्शित करुन कॉपीराईट कायद्यांचे उल्लघंन केल्याप्रकरणी दक्षिण प्रादेशिक विभागाच्या सायबर सेलच्या अधिकार्‍यांनी पहिली कारवाई करुन पुण्यातून एका 26 वर्षांच्या आरोपीस अटक केली आहे. सागर माणिक ंरंधवन असे या आरोपीचे नाव असून तो पुण्यातील दौंड, बस्तीचा रहिवाशी असल्याचे वरिष्ठ पोलीस निरीक्षक नंदकुमार गोपाळे यांनी सांगितले. अटकेनंतर त्याला किल्ला कोर्टाने तीन दिवसांची पोलीस कोठडी सुनावली आहे. सागरने खरेदी केलेल्या एका डोमेनवरुन छावा चित्रपट लिंकद्वारे व्हायरल प्रदर्शित करण्यात आला होता. देशभरात 1818 बोगस लिंकवरुन हा चित्रपट प्रदर्शित होताच व्हायरल झाल्याचे तपासात उघडकीस आले आहे.

छत्रपती संभाजी महाराज यांच्या जीवनावर आधारीत असलेला बहुचर्चित छावा चित्रपट 14 फेब्रुवारीला देश-विदेशात प्रदर्शित झाला होता. या चित्रपटाला सुरुवातीपासून प्रेक्षकांनी भरुभरुन प्रतिसाद दिला आहे. चालू वर्षांत 500 कोटीच्या क्लबमध्ये जाणारा छावा हा पहिलाच चित्रपट ठरला आहेत. मात्र हा चित्रपट प्रदर्शित झाल्यानंतर अवघ्या काही तासांत हा चित्रपट विविध लिंकवर अपलोड झाला होता. देशभरात 1818 लिंकवर हा चित्रपट विविध डिजीटल प्लॅटफॉर्मवर अनधिकृतपणे अपलोड झाल्याचे उघडकीस आले होते. अज्ञात व्यक्तींनी छावा चित्रपट बेकायदेशीरपणे उपलब्ध करुन या चित्रपटाची इंटरनेट लिंक्सच्या माध्यमातून सोशल मिडीयावर अपलोड केले होते. अशा प्रकारे बेकायदेशीर चित्रपट अपलोड करुन कॉपीराईट कायद्याचे उल्लघंन होऊन चित्रपटाच्या निर्मात्यासह वितरणांचे कोट्यवधी रुपयांचे आर्थिक नुकसान झाले होते.

हा प्रकार ऑगस्ट इंटरटेनमेंट प्राव्हेट लिमिटेड कंपनीचे मुख्य कार्यकारी अधिकारी- सीईओ रजत राहुल हक्सर यांच्या निदर्शनास येताच त्यांनी पोलीस उपायुक्त दत्ता नलावडे यांची भेट घेऊन दोषींवर कारवाई करण्याची विनंती केली होती. त्याची गंभीर दखल घेत पोलीस उपायुक्त दत्ता नलावडे यांनी वरिष्ठ पोलीस निरीक्षक नंदकुमार गोपाळे यांच्या सायबर सेलकडे या गुन्ह्यांचा तपास सोपविला होता. याप्रकरणी भारतीय दंड सहिता, कॉपीराईट आणि चलचित्र अधिनियम कलमांतर्गत गुन्हा दाखल होताच सायबर सेल पोलिसांनी तपास सुरु केला होता. तपासादरम्यान स्कायमूव्हीजएचडी डॉट टेक या लिंकवरुन हा चित्रपट व्हायरल झाल्याचे उघडकीस आले होते. ही लिंक सागर रंधवन याच्य नावाने रजिस्ट्रर आहे. तो पुण्यात राहत असल्याने वरिष्ठ पोलीस निरीक्षक नंदकुमार गोपाळे व त्यांच्या पथकातील सहाय्यक पोलीस निरीक्षक रुपाली चौधरी, महिला पोलीस शिपाई रेश्मा धमाळ, पोलीस शिपाई संतोष गलंडे हे पथक पुण्याला गेले होते.

या पथकाने बुधवारी पुण्यातील दौंड परिसरातून सागरला चौकशीसाठी ताब्यात घेतले होते. तपासात सागरने स्कायमूव्हीजएचडी डॉट टेक नावाचे डोमेन खरेदी केले होते. या नावाने अ‍ॅप तयार करुन ते पेसे भरुन त्याने ते अ‍ॅप डाऊनलोड करुन छावासह इतर नवीन प्रदर्शित होणारे चित्रपट प्रेक्षिपित केल्याची कबुली दिली. या कबुलीनंतर त्याला पोलिसांनी अटक करुन पुढील चौकशीसाठी मुंबईत आणले होते. याच गुन्ह्यांत अटक केल्यानंतर त्याला गुरुवारी दुपारी किल्ला कोर्टात हजर करण्यात आले होते. यावेळी त्याला कोर्टाने 13 एप्रिलपर्यंत पोलीस कोठडी सुनावली आहे. त्याची पोलिसाकडून चौकशी सुरु असून त्याच्या चौकशीतून इतर बोगस लिंकची माहिती काढण्याचा पोलीस प्रयत्न करत आहेत. त्याच्या संपर्कात काही आरोपी होते का याचा तपास सुरु आहे.