डार्कनेटवरुन आयात केलेल्या एमडीसह तरुणाला अटक

मुंबई क्राईम टाइम्स डॉट कॉम
२३ जानेवारी २०२५
मुंबई, – विदेशातून डार्कनेटवरुन आयात केलेल्या एमडी ड्रग्जसहीत एका तरुणाला गुन्हे शाखेच्या अधिकार्‍यांनी अटक केली. ऋषिकेश रुमडे असे या आरोपी तरुणाचे नाव असून त्याच्याकडून पोलिसांनी सुमारे साठ लाख रुपयांचा एमडी ड्रग्जचा साठा जप्त केला आहे. त्याच्याविरुद्ध एनडीपीएस कलमांतर्गत कारवाई करण्यात आली असून याच गुन्ह्यांत तो सध्या पोलीस कोठडीत आहे. त्याने डार्कनेटवरुन यापूर्वी अनेकदा ड्रग्ज आयात केल्याचे तपासात उघडकीस आले आहे.

खार परिसरात ऋषिकेश हा राहत असून तो विदेशात आयात केलेल्या ड्रग्जची विक्री करत असल्याची माहिती गुन्हे शाखेच्या अधिकार्‍यांना मिळाली होती. या माहितीनंतर वरिष्ठ पोलीस निरीक्षक दया नायक व त्यांच्या पथकाने खार परिसरातून ऋषिकेशला चौकशीसाठी ताब्यात घेतले होते. तो राजेंद्र सिन्हा चौकाजवळ ड्रग्जची विक्रीसाठी आला होता. त्याच्या अंगझडतीत पोलिसांना ३०९ ग्रॅम वजनाचे एमडी ड्रग्ज सापडले. त्याची किंमत सुमारे ६० लाख रुपये इतकी आहे. ड्रग्जसहीत त्याला नंतर गुन्हे शाखेच्या कार्यालयात आणण्यात आले. चौकशीदरम्यान त्याने ते एमडी ड्रग्ज विदेशातून डार्कनेटवरुन आयात केल्याची कबुली दिली. यापूर्वीही त्याने पंधरा ते वीस वेळा विदेशात ड्रग्ज आयात केल्याचे सांगितले. तो वेगवेगळ्या ऍपच्या माध्यमातून विदेशात ड्रग्ज खरेदी करुन त्याची मुंबई शहरात विक्री करत होता.

अटकेच्या भीतीने तो ड्रग्ज पार्सल स्वतच्या घराऐवजी उत्तरप्रदेश आणि हरियाणातील त्याच्या नातेवाईक आणि मित्रांच्या घरी पाठवत होता. त्यांना नंतर तो पार्सल त्याच्या घरी डिलीव्हरी करण्यास प्रवृत्त करत होता. त्याच्याविरुद्ध खार पोलीस ठाण्यात एनडीपीएस कलमांतर्गत गुन्हा दाखल करण्यात आला असून याच गुन्ह्यांत नंतर त्याला पोलिसांनी अटक केली आहे. तो सध्या पोलीस कोठडीत असून त्याची पोलिसांकडून चौकशी सुरु आहे.