अल्पवयीन कॉलेज तरुणीचा आत्महत्येचा प्रयत्न

मुंबई क्राईम टाईम्स डॉट कॉम
6 मार्च 2025
मुंबई, – कॉलेजमध्ये शिक्षण घेणार्‍या एका अल्पवयीन कॉलेज तरुणीने छत्रपती शिवाजी महाराज टर्मिनसच्या सर्वसाधारण हॉलच्या महिला प्रसाधनगृहात तिक्ष्ण हत्याराने हाताच्या नसा कापून आत्महत्येचा प्रयत्न केल्याचा प्रकार उघडकीस आला आहे. दुपारी पाऊणच्या सुमारास घडलेल्या या घटनेने तिथे उपस्थित प्रवाशांमध्ये एकच खळबळ उडाली होती. या तरुणीला उपचारासाठी सेंट जॉर्ज हॉस्पिटलमध्ये दाखल करण्यात आले आहे. मानसिक तणावातून तिने आत्महत्येचा प्रयत्न केल्याचे पोलीस तपासात उघडकीस आले आहे.

बळीत तरुणी ही ठाण्याच्या कासारवडवली परिसरात राहत असून कॉलेजमध्ये शिक्षण घेते. दुपारी पाऊणच्या सुमारास ती छत्रपती शिवाजी महाराज टर्मिनस रेल्वे स्थानकाच्या सर्वसाधारण हॉलमध्ये आली होती. काही वेळानंतर ती महिलांच्या प्रसाधनगृहात गेी आणि तिने तिक्ष्ण हत्यारराने स्वतला जखमी करुन घेतले होते. हा प्रकार एका महिलेच्या लक्षात येताच तिने तिथे उपस्थित रेल्वे पोलिसांना ही माहिती दिली. या माहितीनंतर रेल्वे पोलिसांनी घटनास्थळी धाव घेतली होती. रक्तबंबाळ झालेल्या या तरुणीला तातडीने सेंट जॉर्ज हॉस्पिटलमध्ये दाखल करण्यात आले होते. तिथेच तिच्यावर उपचार सुरु आहेत. तिची प्रकृती स्थिर असल्याचे पोलिसांनी सांगितले. ही माहिती नंतर तिच्या पालकांसह नातेवाईकांना देण्यात आली होती.

प्राथमिक तपासात गेल्या काही दिवसांपासून ती प्रचंड मानसिक तणावात होती. त्यातून आलेल्या नैराश्यातून तिने स्वतला दुखापत करुन आत्महत्येचा प्रयत्न केल्याचे उघडकीस आले आहे. याप्रकरणी सीएसएमटी रेल्वे पोलीस ठाण्यात तशी नोंद करण्यात आली असून पोलीस पुढील तपास करत आहेत.