चांगला परतावा देण्याच्या आमिषाने अकाऊंटटची फसवणुक

मुंबई क्राईम टाइम्स डॉट कॉम
24 ऑक्टोंबर 2025
मुंबई, – शेअर गुंतवणुकीवर चांगला परतावा देतो असे सांगून खाजगी कंपनीतील अकाऊंटटची 6 लाख 64 हजाराची फसवणुक केल्याप्रकरणी एका वॉण्टेड आरोपीस साकिनाका पोलिसांनी अटक केली. ऋषिकेश प्रशांत पोतदार असे या आरोपीचे नाव असून फसवणुकीच्या याच गुन्ह्यांत तो सध्या पोलीस कोठडीत आहे. फसवणुकीसाठी त्याने सायबर ठगांना बँक खाती पुरविल्याचे तपासात उघडकीस आले असून याच बँक खात्यात फसवणुकीची काही रक्कम ट्रान्स्फर झाली होती. या गुन्ह्यांत त्याच्यासह इतर काही आरोपीचा सहभाग उघडकीस आल्याने त्यांच्या अटकेसाठी पोलिसांनी विशेष मोहीम हाती घेतली आहे.

अनिल शिवमुरत चौबे हे अंधेरीतील साकिनाका परिसरात त्यांच्या कुटुंबियासोबत राहतात. सध्या ते कॅटलिटर इंडियन प्रायव्हेट लिमिटेड या खाजगी कंपनीत अकाऊंटट म्हणून नोकरी करतात. त्यांचे फेसबुकवर एक अकाऊंट असून 1 जूनला घरी असताना ते फेसबुक पाहत होते. यावेळी चुकून त्यांच्याकडून एक लिंक ओपन झाली होती. ही लिंक ओपन होताच त्यांना अज्ञात व्यक्तीने एका व्हॉटअप ग्रुपमध्ये अ‍ॅड केले होते. या ग्रुपमध्ये शेअरसंदर्भातील दैनदिन माहिती दिली जात होती.

काही दिवसांनी त्यांना ग्रुप अ‍ॅडमिन असलेल्या एका महिलेने शेअरमध्ये गुंतवणुकीचा सल्ला देताना त्यांच्या गुंतवणुकीवर चांगला परतावा देण्याचे आश्वासन दिले होते. तिच्यावर विश्वास ठेवून त्यांनी वेगवेगळ्या शेअरमध्ये 6 लाख 64 हजाराची गुंतवणुक केली होती. या गुंतवणुकीवर त्यांना जवळपास बारा लाखांचा प्रॉफिट झाला होता. प्रॉफिटची ही रक्कम त्यांच्या बँक खात्यात ट्रान्स्फर करण्यासाठी तिने त्यांच्याकडे काही रक्कम शेअरमध्ये गुंतवणुक करण्यास सांगितले होते. मात्र त्यांनी आणखीन रक्कम शेअरमध्ये गुंतवणुक करण्यास नकार दिला होता. त्यानंतर ग्रुप अ‍ॅडमिनसह इतरांनी त्यांना प्रतिसाद देणे बंद केले होते.

शेअर गुंतवणुकीच्या नावाने अज्ञात सायबर ठगाकडून फसवणुक झाल्याचे लक्षात येताच त्यांनी साकिनाका पोलिसांत तक्रार केली होती. या तक्रारीची शहानिशा केल्यानंतर पोलिसांनी या सायबर ठगाविरुद्ध फसवणुकीसह आयटी कलमांतर्गत गुन्हा दाखल केला होता. गुन्हा दाखल होताच पोलिसांनी तपास सुरु केला होता. हा तपास सुरु असताना तांत्रिक माहितीवरुन पोलिसांनी ऋषिकेश पोतदारला ताब्या तघेतले होते.

या गुन्ह्यांत त्याचा सहभाग उघडकीस येताच त्याच्यावर अटकेची कारवाई करण्यात आली होती. त्याच्या बँक खात्यात फसवणुकीची काही रक्कम ट्रान्स्फर झाली होती. त्याने सायबर ठगांसाठी बँकेत खाती उघडल्याचे तपासात उघडकीस आले. अटकेनंतर त्याला वांद्रे येथील लोकल कोर्टात हजर करण्यात आले होते. यावेळी कोर्टाने त्यांना पोलीस कोठडी सुनावली आहे.