शेअरमार्केटमध्ये गुंतवणुकीच्या आमिषाने 22 लाखांची फसवणुक
सायबर ठगांना मदत करणार्‍या पाच ठगांना अटक व कोठडी
मुंबई क्राईम टाइम्स डॉट कॉम
21 जुलै 2025
मुंबई, – शेअरमार्केटमध्ये गुंतवणुकीच्या आमिषाने एका व्यक्तीची सुमारे 22 लाखांची फसवणुक केल्याप्रकरणी पाचजणांच्या एका टोळीला उत्तर प्रादेशिक विभागाच्या सायबर सेल पोलिसांनी अटक केली. मुनावर हुसैन युसूफभाई सिंधी, विपुलकुमार कांतीभाई ओड, राशिद मीठूभाई संधी, नवीन रमेशभाई ओड आणि मुकेशभाई ओड अशी या पाचजणांची नावे आहेत. अटकेनंतर या पाचही आरोपींना बोरिवलीतील स्थानिक न्यायालयाने पोलीस कोठडी सुनावली आहे. पाचही आरोपी काही सायबर ठगांच्या संपर्कात असल्याचे, त्यांना फसवणुकीकामी मदत करत असल्याचे तपासात उघडकीस आले आहे.
50 वर्षांचे तक्रारदार दहिसर येथे राहतात. गेल्या वर्षी डिसेंबर महिन्यांत त्यांना प्रिया पटेल नावाच्या एका महिलेने फोन करुन त्यांना शेअरमार्केट गुंतवणुकीबाबत माहिती दिली होती. त्यांना शेअरमध्ये गुंतवणुक करण्यास प्रवृत्त करुन त्यात चांगला फायदा झाला तर टिप्सबाबत त्यांना काही रक्कम सर्व्हिस चार्ज म्हणून देण्याची विनंती केली होती. याच दरम्यान तिने तिच्या सहकार्‍याशी त्यांचे संभाषण करुन दिले होते. त्यांनीही त्यांना शेअरमध्ये गुंतवणुकीवर चांगला परतावा देण्याचे आमिष दाखविले होते. त्यामुळे त्यांनी विविध शेअरमध्ये 22 लाख 50 हजाराची गुंतवणुक केली होती. या गुंतवणुकीवर त्यांना 82 लाखांचा फायदा झाला होता,
मात्र त्यांना ही रक्कम त्यांच्या बँक खात्यात ट्रान्स्फर करता येत नव्हती. त्यामुळे त्यांनी प्रियासह इतरांना व्हॉटअप चॅट करुन विनंती केली होती. मात्र त्यांनी त्यांच्याकडे पैशांची मागणी सुरु केली होती. या आरोपींकडून फसवणुक होत असल्याचे लक्षात येताच त्यांनी सायबर सेल पोलिसांत तक्रार केली होती. या तक्रारीची शहानिशा केल्यानंतर पोलिसांनी संबंधित आरोपीविरुद्ध फसवणुकीसह आयटी कलमांतर्गत गुन्हा दाखल केला होता. गुन्हा दाखल होताच वेगवेगळया परिसरातून मुनावर सिंधीसह इतर चार आरोपींना पोलिसांनी अटक केली.
तपासात त्यांच्याच बँक खात्यात फसवणुकीची ही रक्कम जमा झाली होती. ते सर्वजण काही सायबर ठगांच्या संपर्कात होते. त्यांच्याच सांगण्यावरुन त्यांनी विविध बँकेत खाती उघडल्याचे तपासात उघडकीस आले. या बँक खात्यात फसवणुकीची रक्कम जमा होत होती. त्यानंतर ही रक्कम संबंधित सायबर ठगांना दिली जात होती. त्यामोबदल्यात त्यांना काही ठराविक रक्कमेचे कमिशन मिळत असल्याचे पोलिसांनी सांगितले.
