गुन्हेगारी कृत्यासह मनी लॉड्रिंगप्रकणी अटकेची धमकी देऊन फसवणुक

मुंबई क्राईम टाईम्स डॉट कॉम
31 मे 2025
मुंबई, – गुन्हेगारी कृत्यासह आंतरराष्ट्रीय मनी लॉड्रिंगच्या गुन्ह्यांत सहभागी असल्याचा आरोप करुन अटकेची भीती दाखवून भारतीय सैन्य दलातून हवालदार पदावरुन निवृत्त झालेल्या एका 89 वर्षांच्या वयोवृद्धाची अज्ञात सायबर ठगाने सुमारे सोळा लाखांची फसवणुक केल्याचा प्रकार उघडकीस आला आहे. याप्रकरणी सायबर सेल पोलिसांनी फसवणुकीसह आयटी कलमांतर्गत गुन्हा नोंदवून तपास सुरु केला आहे. निवृत्ती वेतनातून सेव्हिंग केलेल्या रक्कमेचा सायबर ठगांनी अपहार केल्याने या वयोवृद्धाला प्रचंड मानसिक धक्का बसला आहे.

तक्रारदार वयोवृद्ध चांदीवली म्हाडा कॉलनीत त्यांच्या वयोवृद्ध पत्नीसोबत राहतात. ते भारतीय सैन्य दलातून हवालदार पदावरुन निवृत्त झाले आहेत. त्यांना निवृत्ती वेतन मिळत असून त्यातून त्यांनी आतापर्यंत अठरा लाख रुपये जमा केले होते. 3 मे 2025 रोजी ते त्यांच्या घरी होते. यावेळी त्यांना एका महिलेने कॉल करुन ती टेलिकॉम विभागातून बोलत असल्याचे सांगितले. त्यांच्या आधारकार्डवरुन एक सिमकार्ड घेण्यात आला असून या सिमकार्डवरुन अनेकांना विनाकारण मानसिक त्रास दिला जात आहे. त्यामुळे त्यांच्याविरुद्ध कुलाबा पोलीस ठाण्यात गुन्हा दाखल झाला आहे. गुन्हा दाखल झाल्यामुळे त्यांना पोलीस ठाण्यात चौकशीसाठी हजर राहावे लागणार आहे असे सांगितले. यावेळी त्यांनी तिला त्यांचे वय 89 असून त्यांना कुलाबा पोलीस ठाण्यात जाणे शक्य होणार नाही. त्यानंतर तिने कॉल ट्रान्स्फर करत असल्याचे एका व्यक्तीशी त्यांचे बोलणे करुन दिले. यावपेळी या व्यक्तीने त्यांना पोलीस अधिकारी असल्याचे बोलत असल्याचे सांगितले. त्यांच्या आधारकार्डवरुन एक सिमकार्ड घेण्यात आले आहे. त्यांच्याविरुद्ध 26 लोकांकडून तक्रारी प्राप्त झाल्या आहेत. त्याचा सिमकार्डचा गैरवापर करण्यात आला असून त्यांच्यावर कारवाईची धमकी दिली होती.

याच दरम्यान त्यांना एक व्हिडीओ कॉल आला होता. यावेळी समोर एक पोलीस गणवेशात व्यक्ती होता. त्याने त्याचे नाव विजय असल्याचे सांगून तो सध्या कुलाबा पोलीस ठाण्यातून बोलत असल्याचे सांगितले. त्याने त्यांचा आंतरराष्ट्रीय मनी लॉड्रिंगच्या गुन्ह्यांत सहभाग असल्याचे पुरावे सापडले आहेत. या गुन्ह्यांत एका आरोपीला अटक झाली असून त्याच्या घराच्या झडतीत त्यांच्या बँकेचे डेबीट कार्ड सापडले आहे. हा गंभीर गुन्हा असून त्यांच्या सर्व बँक खात्याची चौकशी होणार आहे. त्यांच्या बँक खात्यात बेकायदेशीर रक्कम ट्रान्स्फर झाली आहे. गुन्हा सिद्ध झाल्यास त्यांना किमान तीन वर्षांची शिक्षा होईल अशी भीती दाखविली होती. त्यांचा विश्वास बसावा म्हणून त्याने ट्राय आणि सीबीआयचा लोगो असलेली आणि पोलीस उपायुक्त सायबर विभाग आदी कागदपत्रे त्यांना व्हॉटअपवर पाठविले होते. त्यामुळे त्यांनी त्याला त्यांच्या सर्व बँक खात्याची माहिती दिली होती.

काही वेळानंतर त्याने त्यांना पुन्हा कॉल करुन त्यांच्याविरुद्ध अटक वॉरंट असल्याचे सांगितले. त्यांना त्यांच्या बँक खात्यातील पैसे ट्रान्स्फर करण्यास सांगितले. चौकशीनंतर ही रक्कम त्यांच्या बँक खात्यात पुन्हा ट्रान्स्फर केली जाईल असे सांगितले. त्यामुळे भीतीपोटी त्यांनी त्यांनी वेगवेगळ्या बँक खात्यात सुमारे सोळा लाख रुपये ट्रान्स्फर केले होते. त्यानंतर त्यांना कोणीही कॉल केला नाही. त्यांची रक्कम त्यांच्या बँक खात्यात जमा झाली नव्हती. हा प्रकार संशयास्पद वाटताच त्यांनी घडलेला प्रकार सायबर सेल पोलिसांना सांगितला. त्यांच्या तक्रारीनंतर पोलिसांनी अज्ञात सायबर ठगाविरुद्ध फसवणुकीसह आयटी कलमांतर्गत गुन्हा नोंद करुन तपास सुरु केला आहे.