अज्ञात वाहनाच्या धडकेने ३६ वर्षांच्या स्कूटरस्वाराचा मृत्यू

मुंबई क्राईम टाईम्स डॉट कॉम
७ फेब्रुवारी २०२५
मुंबई, – भरवेगात जाणार्‍या एका अज्ञात वाहनाच्या धडकेने रमेश नामदेव झोरे या ३६ वर्षांच्या स्कूटरस्वाराचा मृत्यू झाला. अपघातानंतर आरोपी वाहनचालकाने घटनास्थळाहून पलायन केले होते. याप्रकरणी दिडोंशी पोलिसांनी अपघाताची नोंद करुन पळून गेलेल्या वाहनचालकाचा शोध सुरु केला आहे. हा अपघात गुरुवारी रात्री दोन वाजता गोरेगाव येथील वेस्टर्न एक्सप्रेस हायवे, दिडोंशी फ्लायओव्हरच्या दक्षिण वाहिनीवर झाल्याचे पोलिसांनी सांगितले.

नरेश गंगाराम झोरे हा घाटकोपरच्या भटवाडीत राहतो. काही दिवसांपूर्वी त्यांची आतेबहिणीचे निधन झाले होते. त्यामुळे नरेश हा त्याचा काका रमेश झोरे यांच्यासोबत त्यांच्या कांदिवलीतील इराणीवाडीतील घरी सांत्वन करण्यासाठी गेले होते. गुरुवारी रात्री एक वाजता ते कांदिवली येथून घाटकोपर येथे जाण्यासाठी त्यांच्या स्कूटरवरुन निघाले होते. ही स्कूटर रात्री दोन वाजता दिडोंशी फ्लायओव्हर ब्रिज, दक्षिण वाहिनीवरुन जात असताना एका अज्ञात वाहनाने त्यांच्या स्कूटरला धडक दिली होती. त्यात त्यांची स्कूटर स्लीप होऊन ते दोघेही खाली पडले. अपघातात रमेश झोरे यांना गंभीर दुखापत झाली होती. त्यामुळे त्यांना तातडीने जोगेश्‍वरीतील ट्रॉमा केअर हॉस्पिटलमध्ये दाखल करण्यात आले होते. तिथे त्यांना डॉक्टरांनी मृत घोषित केले.

अपघाताची माहिती मिळताच दिडोंशी पोलिसांनी घटनास्थळी धाव घेतली होती. याप्रकरणी नरेश झोरे याच्या तक्रारीवरुन पोलिसांनी अज्ञात वाहनचालकाविरुद्ध हलगर्जीपणाने वाहन चालवून एका व्यक्तीच्या मृत्यूस कारणीभूत ठरल्याप्रकरणी गुन्हा दाखल केला होता. अपघातानंतर आरोपी चालक जखमींना कुठलीही वैद्यकीय मदत किंवा पोलिसांना अपघाताची माहिती न देता पळून गेला होता. त्यामुळे त्याचा पोलिसांकडून शोध सुरु आहे.