फ्लॅटसाठी घेतलेल्या तीन कोटीच्या अपहारप्रकरणी आरोपीस अटक

मुंबई क्राईम टाइम्स डॉट कॉम
17 ऑगस्ट 2025
मुंबई, – दोन फ्लॅटसाठी घेतलेल्या सुमारे तीन कोटीचा अपहार करुन फसवणुक केल्याप्रकरणी वॉण्टेड असलेल्या आमीर अफजल खांडवाला या आरोपीस आंबोली पोलिसांनी अटक केली. फसवणुकीच्या रक्कमेतून त्याला 25 लाखांचे कमिशन मिळाल्याचे तपासात उघडकीस आले आहे. अटकेनंतर त्याला लोकल कोर्टाने पोलीस कोठडी सुनावली आहे. या गुन्ह्यांत आमीर खांडवाला याच्यासह इरफान अहमद शकील अहमद पटेल, ओबेद सलीम मर्चंट, नदीम अहमद कासमानी, मोहम्मद आसिफ अब्दुल अजीज मेमन, शकीलअली मोहम्मद बावरा, नईम व अन्य एका अज्ञात व्यक्तीचा समावेश होता. त्यापैकी सहा आरोपींना यापूर्वीच अटक झाली असून आमीर हा गेल्या दोन वर्षांपासून फरार होता. त्याच्या अटकेने या गुन्ह्यांतील अटक आरोपींची संख्या आता सात झाली आहे.

मोहम्मद इलियास बुरानुद्दीन शेख 23 वर्षांचा तरुण जोगेश्वरीतील बांदिवली हिल रोड, विजन हाईट्स अपार्टमेंटमध्ये राहत असून एका खाजगी कंपनीत कामाला आहे. ऑक्टोंबर 2022 रोजी त्याला नवीन फ्लॅटमध्ये गुंतवणुक करायची होती. त्यासाठी त्याचे प्रयत्न सुरु होते. याच दरम्यान त्याची इरफान, ओबेद, आमीरसह इतर आरोपीशी ओळख झाली होती. या ओळखीनंतर ते सर्वजण जोगेश्वरीतील एस. व्ही रोड, साबरी मशिदीजवळील गाळा क्रमांक चारमध्ये भेटले होते. तिथेच त्यांच्यात फ्लॅटविषयी सविस्तर चर्चा झाली होती. या चर्चेदरम्यान आरोपींनी त्यांना दोन फ्लॅट स्वस्तात देण्याचे आश्वासन दिले होते. एक फ्लॅट त्यांच्या राहण्यासाठी तर दुसरा फ्लॅट खरेदी करुन जास्त किंमतीत फ्लॅट विक्री करुन त्यांना आर्थिक फायदा करुन देण्याचे आमिष दाखविण्यात आले होते.

त्यांच्या आमिषाला बळी पडून त्यांनी त्यांना दोन फ्लॅटसाठी ऑक्टोंबर 2022 ते जून 2023 या कालावधीत टप्याटप्याने सुमारे तीन कोटी रुपये दिले होते. त्यासाठी त्यांनी त्यांच्या नातेवाईक, मित्रांसह परिचितांकडून काही पैसे उसने घेतले होते. काही दिवसांनी त्यांनी दोन फ्लॅटची खरेदी करुन ते फ्लॅट हेव्ही डिपॉझिटवर भाडेकरु ठेवल्याचे दस्तावेज बनविले होते. मात्र ठरल्याप्रमाणे त्यांनी दोन्ही फ्लॅटचा ताबा किंवा फ्लॅटचे खरे दस्तावेज दिले नाही. वारंवार विचारणा करुनही ते सर्वजण त्यांना टाळण्याचा प्रयत्न करत होते. त्यामुळे त्यांनी त्यांच्याकडे फ्लॅटसाठी घेतलेल्या पैशांची मागणी सुरु केली होती. यावेळी त्यांनी त्यांना जिवे मारण्याची धमकी देत पैसे मिळणार नाही असे सांगितले. या प्रकाराने त्यांना धक्का बसला होता.

चौकशीदरम्यान या आरोपींनी फ्लॅटच्या नावाने तीन कोटी रुपये घेऊन फ्लॅट खरेदी-विक्रीचा कुठलाही व्यवहार न करता फ्लॅटसाठी घेतलेल्या पैशांचा परस्पर अपहार करुन त्यांची फसवणुक केल्याचे उघडकीस आले होते. हा प्रकार उघडकीस येताच मोहम्मद इलियास यांनी आंबोली पोलिसांत तक्रार केली होती. या तक्रारीनंतर संबंधित सर्व आरोपींविरुद्ध पोलिसांनी सप्टेंबर 2023 रोजी अपहारासह फसवणुक, जिवे मारण्याची धमकी दिल्याप्रकरणी गुन्हा दाखल केला होता. गुन्हा दाखल होताच वेगवेगळ्या परिसरातून पोलिसांनी सहाजणांना अटक केली होती. त्यांच्याविरुद्ध आरोपपत्र सादर करण्यात आले आहे.

याच आरोपपत्रात आमीर खांडवाला याला पाहिजे आरोपी दाखविण्यात आले होते. गेल्या दोन वर्षांपासून आमीर हा फरार होता. त्यामुळे त्याच्या अटकेसाठी पोलिसांनी विशेष मोहीम हाती घेतली होती. ही शोधमोहीम सुरु असताना आमीरला दोन वर्षांनी पोलिसांनी अटक केली. चौकशीत त्याने त्याला फसवणुकीच्या रक्कमेतून 25 लाख रुपये मिळाल्याची कबुली दिली आहे. अटकेनंतर त्याला लोकल कोर्टात हजर करण्यात आले होते. यावेळी कोर्टाने त्याला पोलीस कोठडी सुनावली आहे.