दिड वर्ष उलटूनही ताबा न देता रुमच्या 35 लाखांचा अपहार

मुंबई क्राईम टाईम्स डॉट कॉम
6 डिसेंबर 2025
मुंबई, – दिड वर्ष उलटूनही ताबा न देता रुमसाठी घेतलेल्या 35 लाख 50 हजाराचा अपहार करुन एका गॅरेज कर्मचार्‍यांची चारजणांच्या टोळीने फसवणुक केल्याची घटना गोवंडीतील बैंगनवाडी परिसरात उघडकीस आली आहे. याप्रकरणी रुममालकासह चारही आरोपीविरुद्ध शिवाजीनगर पोलिसांनी अपहारासह फसवणुकीचा गुन्हा दाखल केला आहे. सलीम अन्सारी, आमीन खान, शेर खान ऊर्फ छुट्टन आणि अजगर अली शेख अशी या चौघांची नावे आहेत. या चौघांनाही लवकरच चौकशीसाठी समन्स पाठविले जाणार आहे. चौकशीनंतर त्यांच्यावर कायदेशीर कारवाई केली जाणार असल्याचे पोलिसांनी सांगितले.

55 वर्षांचे तक्रारदार झाकीर हुसैन शहाबुद्दीन हे गोवंडीतील बैंगनवाडी परिसरात त्यांची कुटुंबियांसोबत राहतात. सध्या ते एका गॅरेजमध्ये कामाला आहेत. दोन वर्षांपूर्वी त्यांना एका रुममध्ये गुंतवणुक करायची होती, त्यासाठी त्यांचे प्रयत्नही सुरु होते. याच दरम्यान त्यांच्या परिचित इस्टेट एजंट शेर खानने त्यांना एक रुम विक्रीसाठी उपलब्ध असल्याचे सांगितले. काही दिवसांनी त्याने त्यांना बैंगनवाडी, कमला रमन नगर, साईबाबा मंदिराजवळील एक रुम दाखविला होता. हा रुम अजगर अली याच्या मालकीचा होता. रुमची पाहणी केल्यानंतर तोच रुम खरेदी करण्याचा निर्णय घेतला होता. ठरल्याप्रमाणे त्यांनी अजगरअली, सलीम अन्सारी आणि शेर खान यांच्या समक्ष रुमच्या खरेदी-विक्रीचा व्यवहार सुरु केला होता.

जानेवारी 2024 ते 2 डिसेंबर 2025 या कालावधीत त्यांनी रुमसाठी अजगरअलीला रोख, ऑनलाईन, आरटीजीएसद्वारे 33 लाख 50 हजार रुपये दिले होते. रुम खरेदीनंतर रुमच्या फोटो पाससाठी त्यांनी आमीन खानला अतिरिक्त दोन लाख रुपये दिले होते. या पेमेंटनंतर त्यांच्यात रुमच्या सेल अ‍ॅग्रीमेंट, पॉवर ऑफ अ‍ॅटनी, अ‍ॅफिडेव्हीट आदी कागदपत्रे बनविण्यात आले होते. काही दिवसांनी त्यांच्या नावावर रुम ट्रान्स्फर झाला होता. मात्र पेमेंटसह रुम ट्रान्स्फर करुन त्यांनी दिड वर्ष उलटूनही रुमचा ताबा दिला नाही. वारंवार विचारणा करुनही ते चौघेही त्यांना प्रतिसाद देत नव्हती. वेगवेगळे कारण सांगून त्यांना टाळण्याचा प्रयत्न करत होते. मुलीचा लग्न असल्याचे सांगून अजगरअली हा त्यांना थोडा वेळ थांबा असेच सांगत होता.

या चौघांकडून फसवणुक होत असल्याचे लक्षात येताच झाकीर शहाबुद्दीन यांनी घडलेला प्रकार शिवाजीनगर पोलिसांना सांगितला होता. तसेच या चारही आरोपीविरुद्ध तक्रार अर्ज केला होता. या तक्रार अर्जाची शहानिशा केल्यानंतर या चौघांनी त्यांची फसवणुक केल्याचे प्राथमिक तपासात उघडकीस आले होते. या प्रकारानंतर सलीम अन्सारी, आमीन खान, शेर खान ाणि अजगरअली शेख या चारही आरोपीविरुद्ध पोलिसांनी अपहारासह फसवणुकीचा गुन्हा दाखल केला आहे. या गुन्ह्यांचा तपास सुरु असल्याचे पोलिसांनी सांगितले.