कौटुंबिक वादातून पत्नीची पतीकडून गळा आवळून हत्या

मुंबई क्राईम टाइम्स डॉट कॉम
16 मार्च 2025
मुंबई, – सतत होणार्‍या कौटुंबिक वादातून रागाच्या भरात पत्नीची पतीने गळा आवळून हत्या केल्याची घटना गोरेगाव परिसरात उघडकीस आली आहे. रेखाखातून रॉय शेख असे या हत्या झालेल्या महिलेचे नाव असून रॉय शेख या पतीविरुद्ध बांगुरनगर पोलिसांनी हत्येचा गुन्हा दाखल केला आहे. हत्येनंतर रॉय हा पळून गेल्याने त्याचा पोलिसांकडून शोध सुरु आहे. ही घटना शनिवारी रात्री उशिरा गोरेगाव येथील तिवारी चाळीत घडल्याचे पोलिसांनी सांगितले.

रेखा ही तिचा पती रॉय शेखसोबत गोरेगाव येथील तिवारी चाळीत राहत होते. ते दोघेही मूळचे कोलकाताचे रहिवाशी असून काही महिन्यांपूर्वीच या दोघांचा विवाह झाला होता. कोलकाता येथे नोकरी मिळत नसल्याने या दोघांनी मुंबईत नोकरीसाठी जाण्याचा निर्णय घेतला होता. त्यामुळे लग्नानंतर ते दोघेही मुंबई शहरात आले होते. राहण्याची सोय नसल्याने त्यांनी गोरेगाव येथील तिवारी चाळीत एक रुम भाड्याने घेतला होता. ते दोघेही मजुरीचे काम करत होते. गेल्या काही दिवसांपासून त्यांच्यात कौटुंबिक वाद सुरु होते. त्यातून त्यांच्यात घरात नेहमी खटके उडत होते. रागाच्या भरात अनेकदा रॉय तिला शिवीगाळ करुन मारहाण करत होता.

शनिवारी रात्री रेखा आणि रॉय यांच्यात पुन्हा क्षुल्लक कौटुंबिक कारणावरुन वाद झाला होता. या वादाचे पर्यावसान भांडण होऊन रागाच्या भरात त्याने तिला बेदम मारहाण केली. या मारहाणीनंतर त्याने तिची गळा आवळून हत्या केली होती. त्यानंतर तो रुमला बाहेर कडी लावून पळून गेला होता. काही वेळ बाहेर फेरफटका मारल्यानंतर त्याने रेखाच्या एका मैत्रिणीला फोन केला होता. यावेळी त्याने तिला घडलेला प्रकार सांगून त्याच्याकडून रेखाची हत्या झाल्याची कबुली दिली होती. ही माहिती ऐकून तिला धक्काच बसला होता. त्यामुळे ती रेखाला भेटण्यासाठी तिच्या घरी गेली होती. यावेळी तिला रेखा मृतावस्थेत तिथे पडल्याचे दिसून आले. त्यानंतर तिने ही माहिती बांगुरनगर पोलिसांना दिली.

या माहितीनंतर पोलिसांनी घटनास्थळी धाव घेतली होती. रेखाला पोलिसांनी तातडीने जवळच्या शासकीय हॉस्पिटलमध्ये दाखल केले होते. तिथे तिला डॉक्टरांनी मृत घोषित केले. याप्रकरणी मैत्रिणीच्या तक्रारीवरुन पोलिसांनी आरोपी पती रॉय शेख याच्याविरुद्ध हत्येचा गुन्हा दाखल केला होता. हत्येनंतर तो पळून गेल्याने त्याच्या अटकेसाठ पोलिसांनी विशेष मोहीम हाती घेतली आहे. कौटुंबिक वादातून पत्नीची पतीकडून झालेल्या हत्येने स्थानिक रहिवाशांमध्ये प्रचंड शोककळा पसरली होती.