गोवंडी येथे सीएची 45 लाखांची कॅश नोकरांनी पळविली

कारचालकासह शिपायाविरुद्ध चोरीचा गुन्हा दाखल
मुंबई क्राईम टाइम्स डॉट कॉम
21 सप्टेंबर 2025
मुंबई, – गोवंडी येथे एका चार्टंर्ड अकाऊंटच्या कामानिमित्त आणलेली सुमारे 45 लाखांची कॅश त्यांच्याच दोन नोकरांनी पळवून नेल्याची घटना गोवंडी परिसरात उघडकीस आली आहे. याप्रकरणी आरोपी कारचालकासह कार्यालयातील शिपाई असे दोन चुलत बंधूविरुद्ध गोवंडी पोलिसांनी चोरीचा गुन्हा नोंदवून तपास सुरु केला आहे. नितेशकुमार आणि राहुलकुमार रामविलास महतो अशी या दोघांची नावे असून ते दोघेही मूळचे बिहारचे रहिवाशी आहेत. या दोघांच्या अटकेसाठी पोलिसांनी विशेष मोहीम हाती घेतली आहे.

तेजप्रकाश सोहनलाल डांगी हे वडाळा येथे राहत असून ते व्यवसायाने चार्टर्ड अकाऊंटट आहेत. त्यांच्याकडे गेल्या आठ महिन्यांपासून नितेशकुमार कारचालक म्हणून कामाला होता. नितेश हा प्रामाणिकपणे काम करत असल्याने त्यांचा त्याच्यावर प्रचंड विश्वास होता. राहुलकुमार हा त्याचा चुलत भाऊ असून तो बेरोजगार होता. त्यामुळे त्यांनी त्याला नोकरीवर ठेवावे अशी विनंती नितेशकुमारने त्यांच्याकडे केली होती. त्यामुळे तेजप्रकाश यांनी राहुलकुमारला त्यांच्या कार्यालयात शिपाईची नोकरी दिली होती. त्यांच्याकडे स्टॅम्प ड्युटीसाठी 45 लाख रुपये होते. ही रक्कम त्यांनी त्यांचा मित्र प्रकाश झुनझुनवाला यांच्या अंधेरीतील घरी ठेवण्यासाठी दिले होते.

19 सप्टेंबरला ते नितेशकुमारसोबत काही कामानिमित्त न्यू कफ परेड येथे गेले होते. यावेळी सुमीत बिझनेस पार्कमध्ये त्यांची प्रकाश झुनझुनवाला यांची भेट झाली होती. या भेटीत त्यांनी त्यांचे 45 लाख रुपये घेऊन जाण्याचा सल्ला दिला होता. त्यानंतर त्यांनी त्यांना 45 लाखांची कॅश दिली होती. त्यानंतर ते दोघेही गोवंडी येथे आले होते. त्यांच्या सूनेला एक मुलगी झाली होती. त्यामुळे तेजप्रकाश डांगी हे तिला पाहण्यासाठी रात्री आठ वाजता सूर्या हॉस्पिटलमध्ये गेले होते. यावेळी त्यांच्या कारमध्ये नितेशकुमार हा थांबला होता. त्यांनी कारमध्ये 45 लाख रुपयांची कॅश असल्याची माहिती सांगून त्याला लक्ष ठेवण्यास सांगितले होते.

काही वेळानंतर ते कारजवळ आले होते. यावेळी त्यांना तिथे नितेशकुमार दिसला नाही. त्यामुळे त्यांनी त्याला कॉल केला होता, मात्र त्याने प्रतिसाद दिला नाही. नंतर त्याचा मोबाईल बंद असल्याचे दिसून आले. हा प्रकार संशयास्पद वाटताच त्यांनी राहुलकुमारला कॉल केला, मात्र त्याचाही मोबाईल बंद येत होता. या दोघांनी त्यांच्या कारमधील 500 रुपयांच्या 8400 तर 100 रुपयांच्या 3000 नोटा असा सुमारे 45 लाखांची कॅश घेऊन पलायन केले होते.

हा प्रकार लक्षात येताच त्यांनी गोवंडी पोलिसांना घडलेला प्रकार सांगून दोन्ही नोकराविरुद्ध तक्रार केली होती. या तक्रारीची शहानिशा केल्यानंतर त्यांचा कारचालक नितेशकुमार आणि शिपाई राहुलकुमार यांच्याविरुद्ध पोलिसांनी चोरीचा गुन्हा दाखल केला आहे. ते दोघेही पळून गेल्याने त्यांच्या अटकेसाठी पोलिसांनी विशेष मोहीम हाती घेतली आहे. चोरीनंतर ते दोघेही बिहारला पळून जाण्याच्या तयारीत असल्याने त्यांचा अटकेसाठी एक टिम बिहारला जाणार असल्याचे पोलिसांनी सांगितले.