प्रभादेवी-गोरेगाव येथील शाखेतून १२२ कोटीचा अपहार

मुंबई क्राईम टाईम्स डॉट कॉम
१५ फेब्रुवारी २०२५
मुंबई, – न्यू इंडिया सहकारी बँक लिमिटेड बँकेतील व्यवहारात अनियमितता दिसून आल्यानंतर रिझर्व्ह बँक ऑफ इंडियाने बँकेच्या सर्व व्यवहारावर निर्बंध लागू केल्याची घटना ताजी असताना प्रभादेवी आणि गोरेगाव येथील बँकेच्या शाखेतून सुमारे १२२ कोटीचा अपहार झाल्याचा धक्कादायक प्रकार उघडकीस आला आहे. याप्रकरणी बँकेचे महाव्यवस्थापक हितेश प्रविणचंद्र मेहता यांच्याविरुद्ध दादर पोलीस ठाण्यात अपहारासह फसवणुकीचा गुन्हा दाखल करण्यात आला असून या गुन्ह्यांचा पुढील तपास आर्थिक गुन्हे शाखेकडे वर्ग करण्यात आला आहे. याच गुन्ह्यांत चौकशी केल्यानंतर सायंकाळी हितेश मेहता याला आर्थिक गुन्हे शाखेच्या अधिकार्‍यांनी अटक केली. याच गुन्ह्यांत त्याला रविवारी दुपारी किल्ला कोर्टात हजर केले जाणार आहे. या गुन्ह्यांत हितेशसोबत इतर काहींचा सहभाग उघडकीस आला असून त्यांच्या अटकेसाठी आता पोलिसांनी विशेष मोहीम हाती घेतली आहे.

न्यू इंडिया सहकारी बँक लिमिटेडच्या व्यवहारात गेल्या काही महिन्यांत प्रचंड अनियमितता दिसून आली होती. हा प्रकार उघडकीस आल्यानंतर रिझर्व्ह बँकेने बँकेच्या सर्व व्यवहारावर निर्बंध आणले होते. त्यामुळे बँकेच्या खातेदारांना कोणत्याही शाखेतून पैसे काढता येत नव्हते. रिझर्व्ह बँकेकडून न्यू इंडिया सहकारी बँकेचय सर्व आर्थिक व्यवहाराची चौकशी सुरु असून या चौकशीनंतर बँकेवरील निर्बंध काढले जाणार आहे. ही घटना ताजी असतानाच या बँकेत १२२ कोटीचा आर्थिक गैरव्यवहार झाल्याचे उघडकीस आले आहे. ४८ वर्षांचे देवर्षि शिरीरकुमार घोष हे वरळीतील वीर नरिमन मार्ग, आदर्शनगर परिसरात राहत असून न्यू इंडिया सहकारी बँक लिमिटेडमध्ये ऍक्टिंग चिट अकाऊटींग अधिकारी म्हणून कार्यरत आहेत. याच बँकेत हितेश मेहता हा महाव्यवस्थापक म्हणून कार्यरत होता. १ जानेवारी २०२० ते १२ फेब्रुवारी २०२५ या कालावधीत महाव्यवस्थापक म्हणून कार्यरत असताना हितेशने बँकेतील १२२ कोटीचा अपहार केला होता. गोरेगाव आणि प्रभादेवी येथील तिजोरीतून या रक्कमेचा अपहार करुन त्याने त्याच्या कुटुंबियासह नातेवाईकांच्या बँक खात्यात ही रक्कम ट्रान्स्फर केली होती.

हा प्रकार ऑडिटदरम्यान उघडकीस त्याची वरिष्ठ अधिकार्‍यांकडून गंभीर दखल घेतली होती. या संपूर्ण प्रकरणाची चौकशी केल्यानंतर हितेश यानेच त्याच्या अधिकाराचा गैरवापर करुन हा संपूर्ण गैरव्यवहार केल्याचे उघडकीस आले होते. त्यानंतर याबाबतचा एक अहवाल वरिष्ठ अधिकार्‍यांना सोपविण्यात आला होता. या अहवालानंतर बँकेच्या वतीने देवार्षि घोष यांनी दादर पोलीस ठाण्यात तक्रार केली होती. या तक्रारीची शहानिशा केल्यानंतर हितेशसह इतर आरोपीविरुद्ध पोलिसांनी अपहारासह फसवणुकीचा गुन्हा दाखल केला होता. या गुन्ह्यांची वरिष्ठांनी गंभीर दखल घेत त्याचा तपास आर्थिक गुन्हे शाखेकडे वर्ग केला होता.

हा तपास हाती येताच हितेशला पोलिसांनी चौकशीसाठी ताब्यात घेतले होते. याच गुन्ह्यांत चौकशी केल्यानंतर त्याला सायंकाळी पोलिसांनी अटक केली. रविवारी दुपारी त्यालीा किल्ला कोर्टात हजर करुन त्याची जास्तीत जास्त पोलीस कोठडीची मागणी केली जाणार आहे. या गुन्ह्यांत हितेशला कोणी मदत केली, अपहार केलेल्या हितेशने कुठे गुंतवणुक केली आहे का याचा पोलिसांकडून तपास सुरु असल्याचे सांगण्यात आले.