हितेश मेहता याची लाय डिटेक्टर टेस्ट होणार

मुंबई क्राईम टाईम्स डॉट कॉम
१८ फेब्रुवारी २०२५
मुंबई, – प्रभादेवी आणि गोरेगाव येथून शाखेत काढलेल्या सुमारे १२२ कोटीचा अपहार केल्याचा आरोप असलेला न्यू इंडिया सहकारी बँकेचा महाव्यवस्थापक हितेश प्रविणचंद्र मेहता याची लवकरच आर्थिक गुन्हे शाखेकडून लाय डिटेक्टर टेस्ट होणार आहे. त्यासाठी किल्ला कोर्टात अर्ज केला जाणार आहे. सर्व कायदेशीर प्रक्रिया पूर्ण केल्यानंतर ही टेस्ट होईल. त्यात हितेश मेहताने केलेल्या सर्व आर्थिक व्यवहाराची माहिती जाणून घेण्याचा प्रयत्न केला जाणार आहे. गेल्या दोन दशकांत आर्थिक फसवणुकीच्या गुन्ह्यांतील आरोपीची लाय डिटेक्टर टेस्ट होण्याची ही पहिलीच वेळ असल्याचे बोलले जाते.

गेल्या आठवड्यात न्यू इंडिया सहकारी बँकेत झालेल्या १२२ कोटीच्या आर्थिक गैरव्यवहारप्रकरणी दादर पोलिसांनी गुन्हा नोंदवून त्याचा तपास आर्थिक गुन्हे शाखेकडे वर्ग केला होता. गुन्हा दाखल होताच बँकेचा महाव्यवस्थापक हितेश मेहता आणि बिल्डर धर्मेश जयंतीलाल पौन या दोघांनाही शनिवारी पोलिसांनी अटक केली. अटकेनंतर या दोघांनाही किल्ला कोर्टाने शुक्रवार २१ फेब्रुवारीपर्यंत पोलीस कोठडी सुनावली होती. याच गुन्ह्यांत उन्ननाथन अरुणाचलम ऊर्फ अरुणभाई या आरोपीला पाहिजे आरोपी दाखविण्यात आले असून त्याच्या अटकेसाठी पोलिसांनी विशेष मोहीम हाती घेतली आहे.

पोलीस कोठडीत असताना हितेशने १२२ कोटीपैकी सत्तर कोटी धर्मेश पौन तर चाळीस कोटी अरुणभाई याला दिल्याची कबुली दिली होती. धर्मेशचा कांदिवलीतील चारकोप परिसरात एक एसआरए प्रोजेक्ट सुरु असून याच प्रोजेक्टमध्ये गुंतवणुकीला त्याला हितेशने ही रक्कम दिली होती तर अरुणभाईला त्याच्या सोलर पॅनल व्यवसायासाठी पैसे देण्यात आले होते. मात्र धर्मेशने हितेशकडून त्याला सत्तर कोटी मिळाले नसल्याचा दावा केला आहे. त्याच्याकडून त्याला दोन ते तीन कोटी रुपये मिळाले होते, ती रक्कम त्याने हितेशला पुन्हा दिल्याचे सांगितले. तपासात ते दोघेही वेगवेगळे दावे करत आहेत. रकमांचा आकडा बदलून सांगत असल्याने पोलीस गोंधळून गेले आहेत. हितेश हा खोटी माहिती सांगत असून पोलिसांची दिशाभूल करत आहे असा आरोपच धर्मेशने केला आहे.

या आरोपानंतर हितेशची पोलिसांकडून लाय डिटेक्टर टेस्ट होण्याची शक्यता आहे. त्यासाठी किल्ला कोर्टात रितसर अर्ज केला जाणार आहे. टेस्टसाठी आवश्यक असलेली सर्व कायदेशीर प्रक्रिया पूर्ण केली जाणार आहे. त्यानंतर ही टेस्ट केली जाणार आहे. या टेस्टमध्ये त्याने हा घोटाळा कधी व कसा केला, याकामी त्याला कोणी मदत केली. त्याने पैशांची विल्हेवाट कशा प्रकारे लावली. त्याने कोणाला कधी, केव्हा आणि किती रुपये दिले याबाबत प्रश्‍न विचारली जाणार आहे. त्याच्या चौकशीनंतर काही गोष्टींचा खुलासा होणार असल्याचे पोलिसांकडून सांगण्यात आले. दुसरीकडे याच गुन्हयांत प्रकाश वेर्णेकर यांची पोलिसांनी चौकशी करुन जबानी नोंदवून घेतली. प्रकाश हे बॅकेचे लेखापरिक्षक असून त्यांच्याकडून वेळोवेळी बॅकेचे ऑडिट करण्यात आले होते. याच गुन्ह्यांत रिझर्व्ह बँकेच्या काही अधिकार्‍यांचीही पोलिसांकडून चौकशी होणार आहे.