आर्थिक गुन्हे शाखेने केली पहिली पॉलिग्राफ टेस्ट

मुंबई क्राईम टाईम्स डॉट कॉम
11 मार्च 2025
मुंबई, – प्रभादेवी आणि गोरेगाव येथून शाखेत काढलेल्या सुमारे 122 कोटीचा अपहार केल्याचा आरोप असलेला न्यू इंडिया सहकारी बँकेचा महाव्यवस्थापक आणि या कटातील मुख्य आरोपी हितेश प्रविणचंद्र मेहता याची मंगळवारी कालिना येथील फॉरेन्सिक सायन्स लॅबोरेटरीमध्ये लाय डिटेक्टर टेस्ट पूर्ण करण्यात आली आहे. या टेस्टदरम्यान त्याला आर्थिक व्यवहाराबाबत अनेक प्रश्न विचारण्यात आली होती. त्याच्या रिपोर्टनंतर आर्थिक गुन्हे शाखेची पुढील तपासाची दिशा ठरविली जाणार आहे. या टेस्टनंतर त्याला पुन्हा कारागृहात पाठविण्यात आले होते. गेल्या दोन दशकांत आर्थिक फसवणुकीच्या गुन्ह्यांतील आरोपीची लाय डिटेक्टर टेस्ट होण्याची ही पहिलीच वेळ असल्याचे बोलले जाते.

फेब्रुवारी महिन्यांत दुसर्‍या आठवड्यात न्यू इंडिया सहकारी बँकेत झालेल्या 122 कोटीच्या आर्थिक गैरव्यवहारप्रकरणी दादर पोलिसांनी गुन्हा नोंदवून त्याचा तपास आर्थिक गुन्हे शाखेकडे वर्ग केला होता. गुन्हा दाखल होताच बँकेचा महाव्यवस्थापक हितेश प्रविणचंद्र मेहता, विकासक धर्मेश जयंतीलाल पौन, बँकेचा माजी सीईओ अभिमन्यू सुरेंदरकुमार भोन आणि मनोहर उन्ननाथन अरुणाचलम या चौघांना पोलिसांनी अटक केली होती. चौकशीदरम्यान उन्ननाथन अरुणाचलम ऊर्फ अरुणभाई याचे नाव समोर आले होते. हितेशने 122 कोटीपैकी सत्तर कोटी धर्मेश पौन तर चाळीस कोटी अरुणभाई याला दिल्याची कबुली दिली होती. धर्मेशचा कांदिवलीतील चारकोप परिसरात एक एसआरए प्रोजेक्ट सुरु असून याच प्रोजेक्टमध्ये त्याने गुंतवणुक केली होती तर अरुणभाईला त्याच्या सोलर पॅनल व्यवसायासाठी पैसे देण्यात आले होते. मात्र धर्मेशने हितेशकडून त्याला सत्तर कोटी मिळाले नसल्याचा दावा केला होता. त्याच्याकडून त्याला दोन ते तीन कोटी रुपये मिळाले होते, ती रक्कम त्याने हितेशला पुन्हा दिल्याचे सांगितले.

तपासात ते दोघेही वेगवेगळे दावे करत होते. रकमांचा आकडा बदलून सांगत असल्याने पोलीस गोंधळून गेले आहेत. हितेश हा खोटी माहिती सांगत असून पोलिसांची दिशाभूल करत आहे असा आरोपच धर्मेशने केला आहे. या आरोपानंतर हितेशची पोलिसांकडून लाय डिटेक्टर टेस्ट करण्याची तयारी सुरु केली होती. टेस्टसाठी आवश्यक असलेली सर्व कायदेशीर प्रक्रिया पूर्ण केल्यानंतर आर्थिक गुन्हे शाखेने किल्ला कोर्टात हितेशच्या लाय डिटेक्टर टेस्टसाठी अर्ज केला होता. यावेळी कोर्टाने पोलिसांना त्याच्या टेस्टची परवानगी दिली होती. या परवानगीनंतर हितेशचा कारागृहातून ताबा घेऊन त्याला कालिना येथील फॉरेन्सिक सायन्स लॅबोरेटरीमध्ये आणण्यात आले होते. तिथेच त्याची लाय डिटेक्टर टेस्ट पूर्ण करण्यात आली होती.

तीन तास चाललेल्या या टेस्टमध्ये हितेश मेहताला एकूण 50 प्रश्न विचारण्यात आले होते. त्यासाठी एक प्रश्नावली तयार करण्यात आली होती. त्याने हा घोटाळा कधी व कसा केला, याकामी त्याला कोणी मदत केली. त्याने पैशांची विल्हेवाट कशा प्रकारे लावली. त्याने कोणाला कधी, केव्हा आणि किती रुपये दिले याबाबत प्रश्न विचारण्यात आली होती. त्याचा रिपोर्ट अद्याप पोलिसांना प्राप्त झालेला नाही. सोमवारी 17 मार्चपर्यंत हा रिपोर्ट येण्याची शक्यता आहे. त्यानंतर हा रिपोर्ट नंतर किल्ला कोर्टात सादर केला जाईल. या रिपोर्टनंतर पोलिसांची पुढील तपासाची दिशा ठरविली जाणार आहे.

दुसरीकडे आर्थिक गुन्हे शाखेचे अधिकारी लवकरच रिझर्व्ह बँकेला भेट देणार आहे. मध्यवर्ती बँकेने 12 फेब्रुवारीला बँकेची तपासणी का केली. त्यात बँकेच्या व्यवहारात काही तफावत दिसून आली होती याची माहिती घेतली जाणार आहे. या गुन्ह्यांत आतापर्यंत चौघांना पाहिजे आरोपी दाखविण्यात आले असून त्यात बँकेचे माजी अध्यक्ष हिरेन भानू आणि त्यांची पत्नी गौरी भानू हे विदेशात पळून गेले आहे. त्यामुळे त्यांच्याविरुद्ध लवकरच लुक आऊट नोटीस जारी केली जाणार आहे.