मनपामध्ये नोकरीसह एसआरए फ्लॅटसाठी महिलेची फसवणुक

मुंबई क्राईम टाइम्स डॉट कॉम
26 फेब्रुवारी 2025
मुंबई, – महानगरपालिकेत मुलाला नोकरी आणि मालाड येथे एसआरएचा स्वस्तात फ्लॅट देण्याचे आमिष दाखवून एका महिलेची तिच्याच परिचित आरोपीने सुमारे 29 लाखांची फसवणुक केल्याची घटना माटुंगा परिसरात उघडकीस आली आहे. याप्रकरणी भरत कांजी सोळंखी या आरोपीविरुद्ध माटुंगा पोलिसांनी अपहारासह फसवणुकीचा गुन्हा नोंदवून तपास सुरु केला आहे.

48 वर्षांची तक्रारदार कुसूम विष्णू परमार ही घरकाम करत असून ती तिच्या कुटुंबियांसोबत भाईंद येथील साईबाबानगर, महादेवपूजा इमारतीमध्ये राहते. 2013 साली तिचे पती विष्णू नारायण परमार हे माथेरान ग्रीनसथनगर पालिकेत सफाई कर्मचारी म्हणून काम करत होते. त्यामुळे ते सर्वजण माथेरान येथे वास्तव्यास होते. तिथेच एका कार्यक्रमांत त्यांची भरत सोळंखीशी ओळख झाली होती. त्याने तो गुजरातच्या आनंद, सोजिलाचा रहिवाशी असून विलेपार्ले येथील महानगरपालिकेत सफाई कर्मचारी कामाला असल्याचे सांगितले होते. 2017 साली तिचे पती विष्णू यांनी नोकरीचा राजीनामा दिला होता, त्यानंतर ते सर्वजण भाईंदर येथे शिफ्ट झाले होते. या दरम्यान भरत नेहमी त्यांच्या घरी येत होता. त्याने त्यांना त्याची महानगरपालिकेत चांगली ओळख आहे. त्याने आतापर्यंंत अनेक तरुणांना मनपामध्ये नोकरी दिली असून त्यांचा मुलगा तेजस याला मनपामध्ये नोकरी तसेच मालाड येथील एसआरएमध्ये एक स्वस्तात रुम देण्याचे देण्याचे आश्वासन दिले होते.

काही दिवसांत त्यांच्यात चांगले कौटुुंबिक संबंध निर्माण झाले होते. त्यात भरत हा त्यांचा गावचा असल्याने तिला त्याच्यावर विश्वास होता. त्यामुळे तिने त्याला मुलाच्या नोकरीसह एसआरए रुमसाठी प्रयत्न करण्याची विनंती केली होती. नोकरीचा राजीनामा दिल्यानंतर तिच्या पतीला साडेनऊ लाख रुपये मिळाले होते. यावेळी त्याने नोकरीसाठी दहा लाख तर रुमसाठी तीस लाख रुपये खर्च होतील असे सांगितले. ही रक्कम जास्त असल्याने त्याने तिला नोकरीसाठी सात आणि रुमसाठी 27 लाख रुपये घेण्याची तयारी दर्शविली होती. त्याच्यावर विश्वास ठेवून तिने त्याला टप्याटप्याने 2018 ते 2022 या कालावधीत 29 लाख 50 हजार रुपये ऑनलाईन आणि कॅश स्वरुपात दिले होते. मात्र तीन वर्ष उलटूनही त्याने तिच्या मुलाला महानगरपालिकेत नोकरी दिली नाही किंवा एसआरए रुमचा ताबा दिला नव्हता.

विचारणा केल्यानंतर तो तिला सतत टाळण्याचा प्रयत्न करत होता. त्यामुळे तिने त्याच्याकडे नोकरीसह रुमसाठी दिलेले 29 लाख 50 हजार रुपये परत करण्यास सांगितले, मात्र त्याने तिला पैसे न देता तिची फसवणुक केली होती. या प्रकारानंतर तिने भरत सोळंखीविरुद्ध माटुंगा पोलिसात तक्रार केली होती. या तक्रारीची शहानिशा केल्यानंतर त्याच्याविरुद्ध पोलिसांनी अपहारासह फसवणुकीचा गुन्हा दाखल केला आहे. त्याची पोलिसांकडून चौकशी होणार असून त्याला लवकरच चौकशीसाठी समन्स बजाविले जाणार आहे. भरतने मनपामध्ये नोकरीसह एसआरएमध्ये रुम देण्याच्या आमिषाने इतर काही लोकांची फसवणुक केली आहे का याचा पोलीस तपास करत आहेत.