1.15 कोटीच्या घरफोडीच्या गुन्ह्यांत दोघांना अटक

मुंबई क्राईम टाईम्स डॉट कॉम
13 जुलै 2025
मुंबई, – विलेपार्ले येथील एका व्यावसायिकाच्या घरी झालेल्या 1 कोटी 15 लाखांच्या घरफोडीचा पर्दाफाश करण्यात जुहू पोलिसांना यश आले आहे. याप्रकरणी दोन आरोपींना पोलिसांनी अटक केली असून अटकेनंतर या दोघांनाही लोकल कोर्टाने पोलीस कोठडी सुनावली आहे. राहुल सदाशिव माने आणि सन्नी चाद पवार अशी या दोघांची नावे आहेत. त्यांच्याकडून चोरीचा सर्व मुद्देमाल लवकरच जप्त केला जाणार असल्याचे पोलिसांनी सांगितले.

विक्रम धीरजलाल शहा हे व्यावसायिक असून त्यांचा स्वतचा एक्सपोर्टचा व्यवसाय आहे. सध्या ते त्यांच्या कुटुंबियांसोबत विलेपाले्र येथील जेव्हीपीडी स्किम, अशोकनगर सोसायटीच्या स्प्रिंग विल अपार्टमेंटमध्ये राहतात. 23 जूनला ते त्यांच्या कुटुंबियांसोबत आफ्रिका येथे फिरायला गेले होते. यावेळी त्यांच्या घरी कोणीही नव्हते. ही संधी साधून काही अज्ञात व्यक्तीने त्यांच्या फ्लॅटमध्ये प्रवेश केला होता. कपाटातील विविध हिरे, सोन्याचे दागिने, आठ महागडे घड्याळ असा 1 कोटी 15 लाख 35 हजार रुपयांचा मुद्देमाल चोरी करुन पलायन केले होते. 5 जुलैला ते त्यांच्या घरी आले होते. यावेळी त्यांना त्यांचा फ्लॅट अर्धवट उघडा असल्याचे दिसून आले.

हा प्रकार संशयास्पद वाटताच त्यांनी आत जाऊन पाहणी केली होती. यावेळी त्यांना कपाटातील विविध हिरेजडीत सोन्याचे दागिने आणि महागडे घड्याळ आदी मुद्देमालाची चोरी झाल्याचे दिसून आले. या घटनेनंतर त्यांनी जुहू पोलिसांना ही माहिती दिली होती. त्यांच्या तक्रारीनंतर पोलिसांनी अज्ञात व्यक्तीविरुद्ध घरफोडीचा गुन्हा दाखल केला होता. गुन्हा दाखल होताच पोलिसांनी आरोपीच्या अटकेसाठी विशेष मोहीम हाती घेतली होती.

परिसरातील सीसीटिव्ही फुटेज आणि तांत्रिक माहितीवरुन पोलिसांनी राहुल माने आणि सन्नी पवार या दोघांना संशयित आरोपी म्हणून ताब्यात घेतले होते. चौकशीत या गुन्ह्यांत त्यांचा सहभाग उघडकीस आला. त्यानंतर या दोघांनाही पोलिसांनी अटक केली. अटकेनंतर या दोघांनाही रविवारी दुपारी वांद्रे येथील लोकल कोर्टात हजर करण्यात आले होते. यावेळी कोर्टाने त्यांना पोलीस कोठडी सुनावली आहे.

या दोघांची पोलिसांकडून चौकशी सुरु असून त्यांच्याकडून चोरीचा सर्व मुद्देमाल लवकरच हस्तगत करण्यात येणार असल्याचे पोलिसांनी सांगितले. या दोघांची गुन्हेगारी पार्श्वभूमी आहे का, त्यांच्याविरुद्ध इतर काही गुन्ह्यांची नोंद आहे, या गुन्ह्यांत त्यांचे इतर कोणी सहकारी आहेत का याचा पोलीस तपास करत आहेत.