भरवेगात जाणार्‍या डंपरच्या धडकेने पादचार्‍याचा मृत्यू

मुंबई क्राईम टाइम्स डॉट कॉम
५ फेब्रुवारी २०२५
मुंबई, – भरवेगात जाणार्‍या एका डंपरच्या धडकेने सुरेश जाधव या ५८ वर्षांच्या पादचार्‍याचा मृत्यू झाला. अपघातप्रकरणी विमल शारदाप्रसाद पाल या डंपरचालकाविरुद्ध काळाचौकी पोलिसांनी गुन्हा दाखल केला होता. याच गुन्ह्यांत त्याला नंतर पोलिसांनी अटक केली.

हा अपघात सोमवारी दुपारी एक वाजता काळाचौकी येथील कॉटनग्रीन रेल्वे स्थानकाजवळील अल्बर्ट जंक्शन परिसरात झाला. समीर गुलाब सय्यद हे नायगाव परिसरात राहत असून सध्या काळाचौकी पोलीस ठाण्यात पोलीस हवालदार म्हणून कार्यरत आहे. सोमवारी सकाळी ते त्यांच्या सहकार्‍यासोबत हॉकर्सवर कारवाई करत होते. या हॉकर्सवर कारवाई करुन काहींना पोलीस ठाण्यात आणण्यात आले. याच दरम्यान पोलिसांना अल्बर्ट जंक्शनजवळ अपघात झाल्याची माहिती प्राप्त झाली होती. या माहितीनंतर पोलिसांनी घटनास्थळी धाव घेतली होती. घटनास्थळी पोलिसांना सुरेश जाधव नावाचा एक ५८ वर्षीय व्यक्ती जखमी असल्याचे दिसून आले.

चौकशीदरम्यान सुरेश हा रस्त्यावरुन जात होता. यावेळी भरवेगात जाणार्‍या एका डंपरने त्याला धडक दिली होती. त्यात तो गंभीररीत्या जखमी झाला होता. त्यामुळे त्याला तातडीने केईएम हॉस्पिटलमध्ये दाखल करण्यात आले होते. तिथे उपचार सुरु असताना त्याचा मृत्यू झाला होता. तपासात डंपरचा क्रमांक पोलिसांना प्राप्त झाला होता. त्याच्या चालकाचे नाव विमल पाल असल्याचे पोलिसांना समजले होते. याप्रकरणी समीर सय्यद यांच्या तक्रारीवरुन पोलिसांनी हलगर्जीपणाने डंपर चालवून एका पादचार्‍याच्या मृत्यूस कारणीभूत ठरल्याप्रकरणी विमल पाल याच्याविरुद्ध गुन्हा दाखल केला होता. गुन्हा दाखल होताच आरोपी चालकास पोलिसांनी अटक केली होती.