अंधेरी येथून 1.47 कोटीचा कोकेनसह एमडीएमएचा साठा जप्त

मुंबई क्राईम टाइम्स डॉट कॉम
13 ऑगस्ट 2025
मुंबई, – अंधेरी येथून 1 कोटी 47 लाखांचा कोकेनसह एमडीएमएचा साठा कांदिवली युनिटच्या अ‍ॅण्टी नारकोटीक्स सेलच्या अधिकार्‍यांनी जप्त केला आहे. याच गुन्ह्यांत कृष्णा नावाच्या एका 30 वर्षांच्या तरुणाला पोलिसांनी अटक केली आहे. त्याच्याविरुद्ध पोलिसांनी एनडीपीएस कलमांतर्गत गुन्हा दाखल केला आहे. अटकेनंतर त्याला किल्ला कोर्टाने सोमवार 18 ऑगस्टपर्यंत पोलीस कोठडी सुनावली आहे.

मुंबई पोलिसांनी ड्रग्ज तस्कराविरुद्ध विशेष मोहीम हाती घेतली होती. ही मोहीम सुरु असताना अंधेरी येथे काहीजण कोकेनची डिलीव्हरीसाठी येणार असल्याची माहिती कांदिवली युनिटला मिळाली होती. या माहितीनंतर पोलीस आयुक्त देवेन भारती, सहपोलीस आयुक्त लखमी गौतम, अतिरिक्त पोलीस आयुक्त शैलेश बलकवडे, पोलीस उपायुक्त नवनाथ ढवळे, सहाय्यक पोलीस आयुक्त सुधीर हिरडेकर यांच्या मार्गदर्शनाखाली कांदिवली युनिटचे वरिष्ठ पोलीस निरीक्षक शशिकांत जगदाळे व त्यांच्या सहकार्‍यांनी अंधेरीतील जुहू येथील सेंट जोसेफ स्कूलजवळ साध्या वेशात पाळत ठेवली होती.

मंगळवारी तिथे एक तरुण संशयास्पद फिरताना पोलिसांना दिसला. त्यामुळे त्याला पोलिसांनी चौकशीसाठी ताब्यात घेतले. त्याच्या अंगझडतीत पोलिसांना 1 कोटी 43 लाख रुपयांचे 143 ग्रॅम वजनाचे कोकेन, 3 लाख 90 हजार रुपयांचे एक्स्टॅसीचे (एमडीएमए) तेरा ग्रॅम वजनाच्या गोळ्या असा 1 कोटी 46 लाख 90 हजाराचा मुद्देमाल सापडला. तपासात तो ड्रग्जची विक्रीसाठी तिथे आल्याचे उघडकीस आले. त्यानंतर त्याच्याविरुद्ध एनडीपीएस कलमांतर्गत गुन्हा नोंदवून त्याला पोलिसांनी अटक केली.

अटकेनंतर त्याला बुधवारी दुपारी किल्ला कोर्टात हजर करण्यात आले होते. यावेळी कोर्टाने त्याला सोमवारपर्यंत पोलीस कोठडी सुनावली आहे. त्याच्या चौकशीत ड्रग्ज देणार्‍या व्यक्तीसह इतर आरोपींचा उलघडा करण्यात पोलिसांना यश आले आहे. त्यांच्या अटकेसाठी पोलिसांनी विशेष मोहीम हाती घेतल्याचे सांगण्यात आले.