केवायसी अपडेटच्या बहाण्याने निवृत्त बेस्ट कंडक्टरची फसवणुक

मुंबई क्राईम टाइम्स डॉट कॉम
23 एप्रिल 2025
मुंबई, – केवायसी अपडेटच्या बहाण्याने बेस्टमधून निवृत्त झालेल्या एका वयोवृद्ध कंडक्टरची अज्ञात सायबर ठगाने फसवणुक केल्याची घटना लोअर परेल परिसरात उघडकीस आली आहे. याप्रकरणी अज्ञात सायबर ठगाविरुद्ध ना. म जोशी मार्ग पोलिसांनी फसवणुकीसह आयटी कलमांतर्गत गुन्हा नोंदवून तपास सुरु केला आहे.

60 वर्षाचे राजेंद्र तुकाराम मुळ्ये हे तक्रारदार लोअर परेल येथील सिताराम जाधव मार्ग, त्रिशुळ अपार्टमेंटमध्ये राहत असून डिसेंबर 2023 रोजी ते बेस्टमधून कंडक्टर म्हणून निवृत्त झाले आहे. मंगळवारी 22 एप्रिलला ते त्यांच्या घरी होते. यावेळी त्यांना एका अज्ञात व्यक्तीने कॉल करुन तो त्यांच्या बँकेतून बोलत असल्याचे सांगितले. त्यांच्या बँक खात्याचे केवायसी करणे गरजेचे आहे. केवायसी अपडेट केले नाहीतर त्यांचे बँक खाते बंद होईल. त्यांना कुठलाही व्यवहार करता येणार नाही. त्यामुळे त्यांनी आपण उद्या बँकेत जाऊन केवायसी अपडेट करतो असे सांगितले. यावेळी त्याने केवायसी आजच करावी लागेल, नाहीतर त्यांचे बँक खाते बंद होईल असे सांगितले.

काही वेळानंतर त्याने त्यांच्याकडे आधारकार्ड, पॅनकार्डची माहिती मागितली, तो बँक अधिकारी समजून त्यांनी ती माहिती त्याला शेअर केली होती. त्यानंतर त्यांच्या मोबाईलवरुन दोन ओटीपी आले होते. ते ओटीपी क्रमांक त्यांनी त्याला सांगितला. ही माहिती दिल्यानंतर काही वेळात त्यांना बँकेचे दोन मॅसेज प्राप्त झाले. त्यात त्यांच्या बँक खात्यातून सात ऑनलाईन व्यवहार होऊन 4 लाख 60 हजार रुपये डेबीट झाल्याचे नमूद करण्यात आले होते.

केवायसी अपडेटच्या नावाने अज्ञात सायबर ठगाकडून फसवणुक झाल्याचे लक्षात येताच राजेंद्र मुळये यांनी लागलीच सायबर हेल्पलाईनसह ना. म जोशी मार्ग पोलिसांत तक्रार केली होती. त्यांच्या तक्रारीनंतर पोलिसांनी फसवणुकीसह आयटी कलमांतर्गत गुन्हा दाखल केला आहे. या गुन्ह्यांचा स्थानिक पोलिसांच्या सायबर सेल पथकाकडून तपास सुरु असल्याचे पोलिसांनी सांगितले.