माहीम येथील डंपर अपघातात 50 वर्षांच्या महिलेचा मृत्यू

मुंबई क्राईम टाइम्स डॉट कॉम
23 सप्टेंबर 2025
मुंबई, – माहीम येथील डंपर अपघातात आलियाबानो सलीम खान या 50 वर्षांच्या महिलेचा मृत्यू झाला तर तिचा मुलगा मोहम्मद तबरेज सलीम खान हा गंभीर जखमी झाला. त्याच्यावर सायन हॉस्पिटलमध्ये औषधोपचार करण्यात आले आहे. अपघातानंतर डंपरचालक पळून गेल्याने त्याचा पोलिसांकडून शोध सुरु आहे. याप्रकरणी हलगर्जीपणाने डंपर चालवून एका महिलेच्या मृत्यूस कारणीभूत ठरल्याप्रकरणी डंपरचालकाविरुद्ध गुन्हा दाखल करण्यात आल्याचे पोलिसांकडून सांगण्यात आले.

हा अपघात सोमवारी पावणेबारा वाजता माहीम येथील सायन-माहीम लिंक रोडवरील ब्रिजवर झाल्याचे पोलिसांनी सांगितले. मोहम्मद तबरेज हा धारावीतील म्युनिपल चाळ, 154/बी मध्ये राहत असून धारावीतील एका टी-शर्ट कारखान्यात कामाला आहे. मृत आलियाबानो ही त्याची आई असून ती माहीम येथील नयानगर, रहेजा हॉस्पिटलजवळ राहते. अनेकदा मोहम्मद तबरेज हे त्यांच्या आई-वडिलांना जेवणाचा डब्बा घेऊन जात किंवा त्यांची आई त्यांच्याकडे येऊन जेवणाचा डब्बा घेऊन जात होती.

सोमवारी रात्री पावणेबारा वाजता मोहम्मद तबरेज हा त्याच्या आईसोबत जेवणाचा डब्बा घेऊन त्याच्या स्कूटरने माहीमच्या दिशेने निघाला होता. ही स्कूटर सायन-माहीम ब्रिजवरुन जात असताना अचानक मागून भरवेगात येणार्‍या एका डंपरने त्यांच्या स्कूटरला धडक दिली होती. त्यात ते दोघेही स्कूटरवरुन खाली पडले. यावेळी डंपरच्या टायरखाली आल्याने आलियाबानो ही गंभीररीत्या जखमी झाली होती. अपघाताची माहिती मिळताच माहीम पोलिसांनी घटनास्थळी धाव घेतली होती. जखमी झालेल्या या दोघांनाही पोलिसांनी तातडीने जवळच्या सायन हॉस्पिटलमध्ये दाखल केले होते. तिथे आलियाबानो हिला डॉक्टरांनी मृत घोषित केले.

मोहम्मद तबरेज हादेखील अपघातात जखमी झाल्याने त्याच्यावर प्राथमिक औषधोपचार करण्यात आले. त्याच्या तक्रारीवरुन पोलिसांनी आरोपी डंपरचालकाविरुद्ध हलगर्जीपणाने डंपर चालवून एका महिलेच्या मृत्यूस तर तिच्या मुलाला गंभीर दुखापत होण्यास कारणीभूत ठरल्याप्रकरणी गुन्हा दाखल केला आहे. अपघातानंतर चालक जखमींना कुठलीही वैद्यकीय मदत किंवा अपघाताची माहिती पोलिसांना न देता पळून गेला होता. मात्र त्याचा डंपरचा क्रमांक पोलिसांना सापडल्याने त्याचा पोलिसांकडून शोध सुरु आहे.