विरुद्ध दिशेने जाणार्या बाईकची धडक लागून तरुणाचा मृत्यू
अॅक्टिव्हा बाईकस्वाराविरुद्ध हलगर्जीपणा गुन्हा दाखल
मुंबई क्राईम टाईम्स डॉट कॉम
26 नोव्हेंबर 2025
मुंबई, – विरुद्ध दिशेने भरवेगात बाईक चालवून समोरुन येणार्या बाईकला धडक दिल्याने झालेल्या अपघातात रुतिक सितप या 25 वर्षांच्या तरुणाचा मृत्यू झाला. याप्रकणी माहीम पोलिसांनी हलर्जीपणाने बाईक चालवून एका तरुणाच्या मृत्यूस कारणीभूत ठरल्याप्रकरणी आरोपी अॅक्टिव्हा चालक सोहेब युनूस सोरठिया (40) याच्याविरुद्ध गुन्हा दाखल केला आहे.
हा अपघात रविवारी मध्यरात्री तीन वाजता माहीम येथील मेट्रो स्टेशनजवळील छोटा दर्गाजवळ झाला. 25 वर्षांचा तक्रारदार शुभम रमेश मांडवकर हा शिवडीतील बीडीडी चाळीत राहतो. रुतिक हा त्याचा मित्र असून एकाच परिसरात राहतात. रविवारी रात्री अडीच वाजता शुभम हा रुतिक, साहिल चौगुले आणि हार्दिक कदम या तिघांसोबत त्यांच्या बाईकवरुन शिवडी येथून वांद्रे येथे नास्ता करण्यासाठी निघाले होते. रात्री तीन वाजता ते सर्वजण दादरच्या शिवाजी पार्क येथून वांद्रे येथील एल. जे रोडवरुन जात होते.
माहीम मेट्रो स्टेशनजवळील छोटा दर्गासमोरुन त्यांची बाईक जात असताना अचानक विरुद्ध दिशेने जाणार्या एका अॅक्टिव्हा बाईकस्वाराने रुतिकच्या बाईकला समोरुन जोरात धडक दिली होती. त्यात रुतिकसह आरोपी बाईकस्वार व त्याच्या मागे बसलेली महिला असे तिघेही गंभीररीत्या जखमी झाले होते. यावेळी तिथे जमा झालेल्या लोकांनी तिघांनाही तातडीने जवळच्या भाभा हॉस्पिटलमध्ये दाखल केले होते. रुतिकची प्रकृती गंभीर असल्याने त्याला नंतर केईएम हॉस्पिटलमध्ये हलविण्यात आले होते. तिथेच उपचार सुरु असताना सकाळी नऊ वाजता त्याचा मृत्यू झाला होता.
अपघाताची माहिती मिळताच माहीम पोलिसांनी घटनास्थळी धाव घेतली होती. याप्रकरणी शुभम मांडवकर याची पोलिसांनी जबानी नोंदवून घेतली होती. त्याच्या जबानीनंतर घडलेला प्रकार पोलिसांना समजला. त्यानंतर त्याच्या तक्रारीवरुन पोलिसांनी अॅक्टिव्हा बाईकस्वार सोहेब सोरठिया याच्याविरुद्ध विरुद्ध दिशेने हलगर्जीपणाने बाईक चालवून एका 25 वर्षांच्या तरुणाच्या मृत्यूस कारणीभूत ठरल्याप्रकरणी गुन्हा दाखल केला आहे. या गुन्ह्यांचा तपास सुरु असल्याचे पोलिसांनी सांगितले.
