महिला अधिकार्‍याचा विनयभंग करुन हुज्जत घालण्याचा प्रयत्न
सरकारी कामात अडथळा आणल्याप्रकरणी आरोपीस अटक
मुंबई क्राईम टाइम्स डॉट कॉम
2 एप्रिल 2025
मुंबई, – कर्तव्य बजाविणार्‍या पोलीस पथकासोबत हुज्जत घालण्याचा प्रयत्न करुन अश्लील संभाषण करुन एका अधिकारी महिलेचा विनयभंग करुन जिवे मारण्याची धमकी देऊन सरकारी कामात अडथळा आणल्याप्रकरणी मोहम्मद शरीफ मोहम्मद सलीम शेख ऊर्फ गुड्डू या आरोपीस मानखुर्द पोलिसांनी अटक केली. अटकेनंतर त्याला लोकल कोर्टाने पोलीस कोठडी सुनावली आहे.
ही घटना रविवारी रात्री सव्वाअकरा वाजता मानखुर्द येथील एकविरा हॉटेल रोड, पीएमजीपी कॉलनीत घडली. 30 वर्षांची तक्रारदार नवी मुंबईतील कौपरखैरणे परिसरात राहत असून सध्या मानखुर्द पोलीस ठाण्यात पोलीस उपनिरीक्षक म्हणून कार्यरत आहे. रविवारी रात्री मानखुर्द पोलिसांचे एक विशेष पथक परिसरात गस्त घालत होते. यावेळी त्यांना मोहम्मद शरीफ हा दुकान सुरु ठेवून चप्पल विक्रीचा व्यवसाय करत असल्याचे दिसून आले. त्यामुळे त्याला पोलिसांनी दुकान बंद करण्यास सांगितले.
यावेळी त्याने पोलिसांशी हुज्जत घालून त्यांच्या कामात अडथळा आणण्यचा प्रयत्न केला होता. त्याच्यासह त्याची पत्नी काजल हिने पोलीस गणवेशात असताना त्यांना शिवीगाळ करुन धक्काबुक्की करण्याचा प्रयत्न केला. त्यामुळे या दोघांनाही पोलिसांनी शांत राहण्याचे आवाहन करुनही ते दोघेही पोलिसांशी हुज्जत घालून तक्रारदार महिला अधिकार्‍याशी अश्लील संभाषण करत होते. तुमच्यासारखे अनेक पोलीस आले आणि गेले, माझ्या नादाला लागू नकोस नाहीतर जिवे मारण्याची धमकी देऊ लागले होते. त्यामुळे पोलिसांनी बळाचा वापर करुन या दोघांनाही चौकशीसाठी ताब्यात घेतले होते.
याप्रकरणी तक्रारदार महिला अधिकार्‍याने दिलेल्या तक्रारीवरुन आरोपींविरुद्ध मानखुर्द पोलिसांनी महिला पोलीस अधिकार्‍याशी उद्धट वर्तन, अश्लील संभाषण करुन विनयभंग करणे, पोलिसांशी हुज्जत घालून सरकारी कामात अडथळा आणल्याप्रकरणी गुन्हा दाखल केला होता. गुन्हा दाखल होताच मोहम्मद शरीफ ऊर्फ गुड्डू याला पोलिसांनी अटक केली. अटकेनंतर त्याला दुसर्‍या दिवशी लोकल कोर्टात हजर करण्यात आले होते. यावेळी कोर्टाने त्याला पोलीस कोठडी सुनावली होती.
