ट्रकला धडक लागून 40 वर्षांच्या बाईकस्वाराचा मृत्यू
हलगर्जीपणाने ट्रक उभा करणार्या चालकास अटक
मुंबई क्राईम टाइम्स डॉट कॉम
27 जुलै 2025
मुंबई, – ट्रकला धडक लागून झालेल्या अपघातात लक्ष्मण बापू पाटील या 40 वर्षांच्या बाईकस्वाराचा मृत्यू झाल्याची घटना मुलुंड येथे घडली. याप्रकरणी ट्रकचालक रविंद्र श्रीमंत राजोळ याच्याविरुद्ध हलगर्जीपणाने ट्रक रस्त्यावर उभा करुन एका बाईकस्वाराच्या मृत्यूस कारणीभूत ठरल्याप्रकरणी मुलुंड पोलिसांनी गुन्हा दाखल केला होता. याच गुन्ह्यांत त्याला अटक केल्यानंतर नोटीस देऊन सोडून देण्यात आले.
हा अपघात शुक्रवारी सकाळी साडेसात वाजता मुलुंड येथील ऐरोली ब्रिजजवळील ऐरोलीकडून मुंबईकडे जाणार्या दक्षिण वाहिनीवर झाला. शुक्रवारी सकाळी मुलुंड पोलिसांचे एक विशेष पथक परिसरात गस्त घालत होते, सकाळी आठ वाजता या पथकाला ऐरोली खाडी ब्रिजजवळ अपघात झाल्याचा कॉल आला होता. त्यानंतर पोलीस पथक तिथे रवाना झाले होते. घटनास्थळावर गेलेल्या पोलिसांना अपघातात एक बाईकस्वार जखमी झाल्याचे दिसून आले. त्यामुळे त्याला पोलिसांनी तातडीने जवळच्या वीर सावरकर हॉस्पिटलमध्ये दाखल केले होते. त्याची प्रकृती गंभीर असल्याने त्याला फोर्टीज हॉस्पिटलमध्ये हलविण्यात आले. तिथे उपचार सुरु असताना दुपारी सव्वाच्या सुमारास त्याचा मृत्यू झाला.
प्राथमिक तपासात मृत व्यक्तीचे नाव लक्ष्मण पाटील असल्याचे उघडकीस आले. तो नवी मुंबईतील कौपरखैरणे, सेक्टर एक परिसरात त्याच्या कुटुंबियांसोबत राहत होता. अपघाताची माहिती नंतर त्याची पत्नी रोहिणी पाटील हिला देण्यात आली. हॉस्पिटलमध्ये तिने मृत व्यक्ती तिचा पती लक्ष्मण पाटील असल्याचे पोलिसांना सांगितले. घटनास्थळाचा पंचनामा करताना पोलिसांना ऐरोली खाडी ब्रिजवर ट्रकचालक रविंद्र राजोळे याने त्याचा ट्रक ब्रिजवर धोकादायकरीत्या उभा केला होता.
ट्रकच्या मागे बॅरिकेट तसेच पताका लावला नव्हता. त्यामुळे लक्ष्मण पाटील हा बाईकवरुन जाताना त्याचा ट्रकचा अंदाज आला नाही. बाईकची ट्रकला धडक लागून तो गंभीररीत्या जखमी झाला होता. त्यात त्याच्या डोक्याला, छातीला आणि पायाला गंभीर दुखापत झाली होती. त्याच्या मृत्यूस ट्रकचालक रविंद्र राजोळ हाच जबाबदार असल्याने त्याच्याविरुद्ध मुलुंड पोलिसांनी गुन्हा दाखल केला होता. याच गुन्ह्यांत नंतर त्याला पोलिसांनी अटक केली. अटकेनंतर त्याला नोटीस देऊन सोडून देण्यात आले. रविंद्र हा ट्रकचालक असून तो कर्नाटक बसोकल्याण, नारायणपूरचा रहिवाशी असल्याचे पोलिसांनी सांगितले.
