मिक्सर ट्रकच्या धडकेने महिलेचा मृत्यू तर बाईकस्वार जखमी
अपघाताला जबाबदार असलेल्या ट्रकचालकास अटक
मुंबई क्राईम टाईम्स डॉट कॉम
30 नोव्हेंबर 2025
मुंबई, – भरवेगात जाणार्या मिक्सर मोटार ट्रकची बाईकला धडक लागून झालेल्या अपघातात शुभांगी सुरेंद्र मगरे या 49 वर्षांच्या महिलेचा मृत्यू झाला तर गणेश विश्राम माधव हा 25 वर्षांचा उबर रॅपिडो बाईकस्वार जखमी झाला. त्याच्यावर मुलुंडच्या फोर्टीज हॉस्पिटलमध्ये उपचार सुरु असून त्याची प्रकृती गंभीर असल्याचे पोलिसांनी सांगितले. याप्रकरणी मिक्सर ट्रकचालक जवाहीर बंशराज यादव याच्याविरुद्ध पोलिसांनी गुन्हा नोंदवून त्याला अटक केली आहे.
हा अपघात शनिवारी 29 नोव्हेंबरला सकाळी अकरा वाजता मुलुंड येथील पूर्व दुतग्रती महामार्गावरील ऐरोली फ्लायओव्हर ब्रिजखालील ऐरोली जंक्शनजवळ झाला. शुभांगी ही मलुंड येथील मुलुंड-गोरेगाव लिंक रोड, सेंचुरा-ए सनरुप टॉवर इमारतीमध्ये राहत असून माटुंगा येथे कामाला आहे. शनिवारी तिने उबेर रॅपिडोची एक बाईक बुक केली होती. याच बाईकवरुन ती मुलुंड येथून माटुंगा येथे कामासाठी जात होती. तिच्यासोबत बाईकस्वार गणेश माधव हा होता.
ही बाईक सकाळी अकरा वाजता ऐरोली जंक्शनजवळून जात होती. यावेळी भरवेगात जाणार्या अशोक लेलंड कंपनीच्या मिक्सर मोटार ट्रकने त्यांच्या बाईक जोरात धडक दिली होती. त्यात बाईक स्लीप होऊन गणेश जखमी झाला तर त्याच्या मागे बसलेली शुभागी ही काही अंतरावर रस्त्यावर फेकली गेली होती. अपघाताची माहिती मिळताच वाहतूक पोलिसांनी घटनास्थळी धाव घेतली होती. जखमी झालेल्या दोघांनाही पोलिसांनी तातडीने मुलुंडच्या फोर्टीज हॉस्पिटलमध्ये दाखल केले होते. तिथे शुभांगीला डॉक्टरांनी मृत घोषित केले तर गणेशची प्रकृती गंभीर असल्याने त्याला अतिदक्षता विभागात दाखल करण्यात आले होते.
अपघाताला जबाबदार असलेल्या जवाहीर यादव याला नवघर पोलिसांनी ताब्यात घेतले होते. त्याच्याविरुद्ध पोलिसांनी मिक्सर मोटार ट्रक हलगर्जीपणाने चालवून एका महिलेच्या मृत्यूस तर दुसर्याला गंभीर दुखाप होण्यास कारणीभूत ठरल्याप्रकरणी गुन्हा दाखल केला होता. याच गुन्ह्यांत नंतर त्याला पोलिसांनी अटक केली. बंशराज हा मूळचा उत्तरप्रदेशच्या आजमगढ, सगडी बर्माचा रहिवाशी असून सध्या तो नवी मुंबईतील मोहा गाव, बेलापूर अंबुजा सिमेंट कंपनीत कामाला असल्याचे पोलिसांनी सांगितले.
