ऑल आऊट ऑपरेशनदरम्यान 70 मद्यपी चालक सापडले

मुंबई क्राईम टाईम्स डॉट कॉम
1 मार्च 2025
मुंबई, – चालू वर्षांतील पहिल्याच ऑल आऊट ऑपरेशनदरम्यान मुंबई पोलिसांनी मद्यप्राशन करुन वाहन चालविणार्‍या सत्तर वाहनचालकाविरुद्ध कारवाई केली होती. शुक्रवारी रात्री उशिरा अचानक मुंबई पोलिसांनी ऑल आऊट ऑपरेशन हाती घेतली होती. यावेळी संपूर्ण शहरात 207 ठिकाणी कोम्बिंग ऑपरेशन तर 113 ठिकाणी नाकाबंदी करण्यात आली होती. 6901 वाहनांची तपासणी केल्यानंतर 1891 वाहनचालकाविरुद्ध विविध कलमांतर्गत कारवाई करण्यात आली होती. विशेष म्हणजे या कारवाईदरम्यान बारा पाहिजे आणि फरारी आरोपींना अटक करण्यात पोलिसांना यश आले.

शुक्रवारी रात्री मुंबई पोलिसांनी रात्री अकरा वाजता अचानक ऑल आऊट ऑपरेशन मोहीम सुरु केले होते. रात्री अडीच वाजेपर्यंत ऑपरेशन सुरु होते. यावेळी पाच प्रादेशिक विभागाचे अतिरिक्त पोलीस आयुक्त, तेरा झोनल पोलीस उपायुक्त, 41 सहाय्यक पोलीस आयुक्त आणि सर्वच पोलीस ठाण्याचे वरिष्ठ पोलीस निरीक्षक यांच्या मार्गदर्शनाखाली पोलीस ठाण्यातील पोलीस अधिकारी आणि कर्मचार्‍यांनी आपल्या हद्दीत विशेष मोहीम हाती घेतली होती. पोलीस आयुक्त विवेक फणसळकर, विशेष पोलीस आयुक्त देवेन भारती, सहपोलीस आयुक्त सत्यनारायण चौधरी यांनी पोलीस ठाणे, नाकाबंदी आणि कोम्बिंग ऑपरेशदरम्यान विविध ठिकाणी भेट देऊन पोलिसांचे मार्गदर्शन केले. यावेळी पोलिसांकडून 207 ठिकाणी कोम्बिंग ऑपरेशन राबवून बाराहून अधिक पाहिजे आणि फरारी आरोपींना अटक केली. 142 कलमांतर्गत 54 आरोपींवर तर घातक शस्त्रे बाळगल्याप्रकरणी सोळा आरोपींविरुद्ध कारवाई करण्यात आली.

ऑल आऊट ऑपरेशनदरम्यान 14 जुगार आणि इतर अवैध धंद्यांवर छापे टाकण्यात आले होते. 46 आरोपींवर अजमिनपात्र वॉरंट आणि 25 आरोपींवर स्टॅडिंग वॉरेटची बजावणी करण्यात आली होती. ड्रग्ज तस्करीप्रकरणी एकूण पंधरा गुन्ह्यांची नोंद करण्यात आली. 120, 122 महाराष्ट्र पोलीस कायदा कलमांतर्गत 56 जणांवर कारवाई करण्यात आली. ऑल आऊट ऑपरेशनदरम्यान एकूण 113 ठिकाणी नाकाबंदीचे आयोजन करण्यात आले होते. 6 हजार 901 वाहनांची तपासणी करुन 1 हजार 891 वाहनचालकावर कारवाई करण्यात आली. कलम 185 मोटार वाहन कायादा अन्वये 70 वाहन चालकावर ड्रंक अ‍ॅण्ड ड्राईव्हची करण्यात आली होती.