संगीतकार प्रितम चक्रवर्तीच्या स्टुडिओमध्ये ४० लाखांची चोरी

मुंबई क्राईम टाईम्स डॉट कॉम
७ फेब्रुवारी २०२५
मुंबई, – बॉलीवूडचे प्रसिद्ध संगीतकार प्रितम चक्रवर्ती यांच्या गोरेगाव येथील स्टुडिओमधून सुमारे ४० लाखांची कॅश घेऊन ऑफिसबॉयने पलायन केल्याची घटना उघडकीस आली आहे. याप्रकरणी आशिष सयाल या ३२ वर्षांच्या ऑफिसबॉयविरुद्ध मालाड पोलिसांनी चोरीचा गुन्हा नोंदवून त्याचा शोध सुरु केला आहे. त्याच्या अटकेसाठी मालाड पोलिसांसह गुन्हे शाखेच्या अधिकार्‍यांनी विशेष मोहीम हाती घेतल्याचे सांगण्यात आले.

विनित चंद्रकांत छेडा हा कांदिवलीतील डहाणूकरवाडी परिसरात राहतो. गेल्या दोन वर्षांपासून तो संगीतकार प्रितम चक्रवर्ती यांच्याकडे मॅनेजर म्हणून कामाला आहे. प्रितमचा युनिमुस रेकॉर्ड प्रायव्हेट लिमिटेड नावाचा म्युझिक स्टुडिओ गोरेगाव येथील रुस्तमजी ओझोन, २००२/टॉवर क्रमांक सहामध्ये आहे. तिथेच आशिष सयाल हा गेल्या सात वर्षांपासून ऑफिस बॉय म्हणून कामाला होता. ४ फेब्रुवारीला दुपारी दोन वाजता मधू मंताना फिल्मचे निर्माता मधू संताना यांचा एक कर्मचारी प्रितम चक्रवर्ती यांच्या व्यवसायाचे सुमारे ४० लाख रुपये घेऊन आला होता. ही रक्कम विनित छेडा याने ताब्यात घेतल्यानंतर ती एका ट्रॉली बॅगेत ठेवली होती. यावेळी तिथे आशिष, अहमद खान आणि कमल दिशा आदी उपस्थित होते.

बॅगेत पैसे ठेवल्यानंतर विनित काही कागदपत्रांवर सही घेणयसाठी प्रितम चक्रवर्ती यांच्या त्याच अपार्टमेंटमधील घरी गेला होता. काही वेळानंतर स्टुडिओमध्ये आल्यानंतर त्याला तिथे ती ट्रॉली बॅग दिसली नाही. त्यामुळे त्याने अहमद खानला बॅगेबाबत विचारणा केली होती. यावेळी त्याने आशिष सयाल हा प्रितम यांच्या घरी बॅग घेऊन गेल्याचे सांगितले. त्यामुळे त्याने आशिषला कॉल केला, मात्र त्याने कॉल घेतला नाही. नंतर त्याने त्याचा मोबाईल बंद ठेवला होता. सुमारे ४० लाखांची कॅश घेऊन आशिष हा स्टुडिओमधून पळून गेल्याची खात्री होताच विनितने हा प्रकार प्रितम चक्रवर्ती यांना सांगितला. त्यानंतर त्यांनी त्याल पोलिसांत तक्रार करण्याचा सल्ला दिला होता.

त्यानंतर विनितने घडलेला प्रकार मालाड पोलिसांना सांगून तिथे आशिषविरुद्ध तक्रार केली होती. या तक्रारीची शहानिशा केल्यानंतर त्याच्याविरुद्ध पोलिसांनी चोरीचा गुन्हा दाखल केला आहे. आशिष हा पळून गेल्याने त्याच्या अटकेसाठी मालाड पोलिसांसह स्थानिक गुन्हे शाखेच्या अधिकार्‍यांनी विशेष मोहीम हाती घेतली आहे. त्याला लवकरच चोरीच्या कॅशसहीत अटक केली जाईल असे पोलिसांकडून सांगण्यात आले. यह जवानी है दिवानी, कलंक, सिकंदर, दिलवाले, अजब प्रेम की गजब कहानी, भुलभुलैया, ब्रमाहस्त्र, यह दिल है मुश्किल, तुम मिले, धूम थ्री आदी चित्रपटांमध्ये प्रितम यांनी संगीत दिले आहेत.