पोलीस शिपायाच्या बँक खात्यातून सायबर ठगाकडून डल्ला

मुंबई क्राईम टाइम्स डॉट कॉम
4 सप्टेंबर 2025
मुंबई, – बँक खात्याशी संबंधित कुठलीही माहितीसह ओटीपी शेअर केला नसताना एका पोलीस शिपायाच्या बँक खात्यातून ऑनलाईन मोबाईलची ऑर्डर करुन अज्ञात सायबर ठगाने 1 लाख 30 हजारावर डल्ला मारल्याची घटना अंधेरी परिसरात उघडकीस आली आहे. याप्रकरणी तक्रारदार पोलीस शिपायाच्या तक्रारीवरुन वर्सोवा पोलिसांनी फसवणुकीसह आयटी कलमांतर्गत गुन्हा नोंदवून अज्ञात सायबर ठगाचा शोध सुरु केला आहे.

मुकेश यशवंत जाधव हे अंबरनाथ येथील रहिवाशी असून सध्या वर्सोवा पोलीस ठाण्यात पोलीस शिपाई म्हणून कार्यरत आहेत. 5 ऑगस्टला ते दिवसपाळी ड्यूटीवर हजर होते. सकाळी साडेअकरा वाजता अंधेरीतील चार बंगला परिसरात गस्त घालत असताना त्यांच्या मोबाईल बँकेतून एक मॅसेज आला होता. त्यात त्यांच्या बँक खात्यातून काही ऑनलाईन व्यवहार झाल्याचे दिसून आले. हा प्रकार संशयास्पद वाटताच ते बँकेत गेले होते. तिथे जाऊन चौकशी केल्यानंतर त्यांच्या बँक खात्यात 1 लाख 30 हजार 592 रुपयांचे ऑनलाईन व्यवहार झाल्याचे समजले.

19 ऑगस्टला त्यांच्या बँक खात्यातून फिल्पकार्डवरुन ओप्पो आणि अ‍ॅपल कंपनीचा आयफोन असे दोन मोबाईल ऑनलाईन घेण्यात आले होते. मात्र त्यांनी ते मोबाईल ऑनलाईन खरेदी केले नव्हते. याबाबत त्यांनी बँकेला सांगून त्यांचे बँक खाते फ्रिज करण्याची विनंती केली होती. त्यांनी त्यांच्या बँक खात्यासह कुठलाही ओटीपी क्रमांक कोणालाही शेअर केला नव्हता. तरीही त्यांच्या बँक खात्याची माहिती काढून अज्ञात सायबर ठगाने त्यांच्या खात्यातून ऑनलाईन व्यवहार करुन दोन मोबाईलची खरेदी केली होती. त्यातून त्यांच्या खात्यातून 1 लाख 30 हजार रुपये डेबीट झाले होते.

हा प्रकार लक्षात येताच त्यांनी वर्सोवा पोलीस ठाण्यात तक्रार केली होती. या तक्रारीची शहानिशा केल्यानंतर पोलिसांनी अज्ञात सायबर ठगाविरुद्ध फसवणुकीसह आयटी कलमांतर्गत गुन्हा दाखल केला आहे. या गुन्ह्यांचा वर्सोवा पोलीस ठाण्यातील सायबर सेलचे अधिकारी तपास करत आहेत. पोलीस शिपायाच्या बँक खात्यावर सायबर ठगाने डल्ला मारल्याचे पोलिसांमध्ये एकच खळबळ उडाली आहे.